蟲筆感想 睇波日記(六)



2月10日(星期日)

昨日返回倫敦休息後,今日向溫布萊出發,睇英格蘭⋯唔係睇英格蘭,係托定咸熱刺先岩。當我到地鐵站時,今日報告係,行最近的柏汀頓站的路線今日作維修工程⋯結果我坐一個站後,轉巴士前往柏汀頓。你邊會估到,運滯的事接二連三跟住來。去溫布萊中心的一般地鐵同樣因維修工程而中止今日服務(屌你咩🤣,咁樣玩我。不過唔係星期日整路,係平日可能仲屌得厲害。),唯有去到中轉站再轉接駁巴士去。去到第一時間當然醫下肚,同埋外圍都好多黃牛黨賣飛(自從孫興民效力熱刺後,的確多左韓國遊客前往英國旅遊。),未入溫布萊場地前,先有嚴密保安檢查,而背囊大細都有限制,如果太大他們會建議你放袋去存物間,比另一個袋你放必需品帶入球場。經過檢查後,我要前往售票處拎波飛,途中聽到一家疑似香港人家庭對話,話個到人多,去個邊買波飛。但出面寫住,今日係唔會有波飛買(當然英文),結果佢地有無入場,我就唔知。係售票處拎取波飛後(大家如果在球場取飛,一定要帶護照,職員要証明波飛屬本人先有得拎。),在場外同球會專門店行左陣就排隊等入場。今日坐區域如去左南韓打氣區,入場不久好多南韓球迷拎出國旗影相、高難度自拍(唔好問我D女得唔得),佢地見到孫興民出場熱身隨即舉旗支持,而孫興民(Son Hung Min)亦係熱身過後同一眾球迷打個招呼。其後比賽開始,雙方隨即互相博擊。李斯特城打法以突擊為主,意外的是華迪(Jamie Vardy)居然列作後備,睇來同領隊佩爾(Claude Puel)不和係真。右路多依重右後衛彭利拿(Richardo Pereira),反而他右翼隊友加素(Rachid Ghezzal)無太突出之處。相反左路捷維(Ben Chilwell)同外借回歸的班尼斯(Harvey Barnes)夾慣夾熟,不過班尼斯選擇明顯可以更好,可以交波卻選擇射門,日後多落場吸收經驗可以改善呢個問題。中場三個工作分明,尼迪迪(Wilfred Ndidi)專注防守,迪利文斯(Youri Tielemans)在中場上做串聯有效率。而馬特臣(James Maddison)為前線提供火藥進攻,不過呢場起用格雷(Damari Gray)擔任前鋒,雖然他能勝任,但有位或面對對方中堅明顯力不從心,翼鋒先係佢擅長位置。托定咸熱刺基本上強陣出戰,簡尼(Harry Kane)受傷由路蘭迪(Fernando Llorente)擔任正選,他拍擋孫興民同艾歷臣(Christian Eriksen)則從後支援。中場今日起用史基比(Oliver Skippe)相當意外,普捷天奴(Mariciuo Pochettino)起用小將有一定心得,而他今場踢得唔錯。而我最近留意的雲克斯(Harry Winks),他代替受傷的戴亞(Eric Dier)勝任有餘,我認為佢絕對有能力擔任正選。賽事一如所料,山齊士(Davinson Sanchez)的頭鎚及艾歷臣靚波協助熱刺領先兩球。其後李斯特城獲判12碼後,後備上陣華迪操刀卻被羅利斯(Hugo Lloris)救出。以前老鬼講過,如果熱身不足即時處理12碼多出事。不過華迪將功贖罪,接應彭利拿傳球射入熱刺大門。其後熱刺及李斯特城分別換人,令賽事處於膠著狀態,最後孫興民入球,決定狐狸敗走溫布萊球場。而一眾前來睇孫興民的球迷,最開心不過。離開球場返市中心個陣,地鐵排長龍,巴士滿客係咁飛站🙉,結果去到Harrods個陣⋯早收工(星期日會提早)。最後影下相,明日再去過買野。

由住的地方出發。

等緊車轉去溫布萊。

溫布萊球場豎立卜比摩亞像。

排隊等入場。

岩岩入場。

南韓球迷開始影相自拍。

托定咸球員熱身。

賽前紀念沙拉。

入場儀式。

準備開波。

馬特臣準備開角球。

今次到加素。

下半場準備開波。

去到Harrdos,點知收工,唯有影相留念,明日就去。

倫敦街頭隨影。

倫敦必去地方,個廣告係景點。

留言


請按此登錄後留言。未成為會員? 立即註冊
    快捷鍵:←
    快捷鍵:→