香港城迷在澳洲第六回:佢都係我同鄉喎續集

HK Blues 城迷手記 於 21/11/2017 發表 收藏文章
經過2星期嘅考試同論文嘅折磨,終於有時間可以出返篇文啦。唔知兩個星期大家自己嘅愛隊同埋自己鍾意一國家隊比賽踢成點呢?我就滿意之中第一點遺憾啦,睇着曼城以二比零贏左李斯特城又繼續保持不敗當然對於我呢個鏝迷來講係非常開心嘅件事,雖然我係德國迷但係啊見到意大利入唔到世界盃決賽周我就覺得有啲可惜,由細到大年年世界盃都見到意大利有份出席亦都有唔錯嘅成績,加上我最鍾意嘅龍門保方終於要退出國家隊真係覺得時間過得好快,不過都希望新任龍門當拿龍馬可以成功延續保方e一個傳奇成為新任意大利傳奇龍門。

唔知大家記唔記得我上期講過我會入場睇布里斯班獅吼嘅比賽呢?我選擇係考試前嘅一日俾自己一個放鬆嘅機會 - 入場睇比賽。

比賽前嘅一個鐘我已經到達左比賽場地附近嘅火車站,經過球場附近一間麥記嘅時候,發現好多着住橙色衫嘅球迷聚集,氣氛真係比而家香港本地聯賽嘅好好多,嗰日係特別主場日,因為有雙料娛樂:以一張門票價錢可以睇到兩場比賽 - 所以吸引左過萬人入場睇女子隊同埋男子嘅比賽,女子隊就以四比一輸波,以男子隊就係零比零打和。

睇到女子隊嘅比賽就諗起自己學界時候比賽嘅段段畫面,佢哋嘅踢法雖然唔係最頂級,但係睇佢哋踢波嘅時候都有一種莫名奇妙嘅興奮感覺尤其是每一次一個球同埋罰球都希望可以入波。相信大家如果有留意呢場女子隊比賽的話,大家會發現入球球員係我哋香港嘅張煒琪,不過我當場所見其實係為煒琪隊友策動呢一次嘅攻門。後來對着女子聯賽第一嘅珀斯光輝強勁嘅攻勢都無晒辦法最後輸波。呢場比賽完咗嘅時候我都沖左去場邊搵到瑋琪攞自拍亦都鼓勵佢希望佢下場可以繼續努力(接下來嘅兩場比賽亦都錄得勝利,並且以3分優勢排係榜首)

到男子隊比賽,如果大家有留意澳職的話就知道以前係英超米杜士堡打滾過嘅意大利前鋒,人稱:巨無霸嘅 馬卡朗尼(Massimo Maccarone)啱啱今季免費加盟左獅吼。不過小弟就覺得佢嘅家門對於獅吼冇乜幫助啦,睇完成場比賽硬係覺得機動力不足反擊同進攻嘅時候速度唔夠,導至入唔到波。相比啱啱離開獅吼,上季澳職神射手嘅占美麥卡倫(Jamie McLaren) 真係相差一大截嘅機動能力。咁啱學校嘅足球教練亦都係獅吼女子隊嘅其中一位助教,有次同佢討論過現時2隊獅吼嘅戰術,我同教練都覺得暫時兩隊波用嘅兩位大隻中鋒(瑋琪,馬卡朗尼)都唔係太有效,尤其是獅吼主場係一個比較大嘅球場,只要對手夠快就可以化解攻勢,希望兩隊教練都諗到辦法解決呢個問題係聯賽達致更加好嘅成績啦。

整體來講雖然球隊踢得唔係理想,但係成個球場氣氛,球迷同球員之間嘅互動,都係非常之好嘅。希望嚟緊如果有時間嘅話可以多啲入場睇支持一下布里斯班獅吼嘅比賽啦。

文:瘟神
11/2017

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→