雲帥：今季是梳爾天下…我估 精選

上年曼聯2700萬鎊買入一位19歲的小伙子，你話好貴、唔抵、唔知有無入錯貨？大家out喇！有個4900萬鎊嘅20歲的小伙子出現咗啦！不過人哋嘅事唔好理，睇返2700萬小子梳爾先！外間對佢真係有啲harsh架，話都唔知係唔係水貨…不過佢真係好勤力，為咗自己體能好啲，人哋放假佢就加操，心態無得頂！而雲帥都對佢好有信心噃。

佢咁講：「我諗呢一季就係梳爾嘅天下喇。我相信佢，佢亦應該感覺到我嘅期望，不過我最想佢表現到自己嘅能力啦！老實講，佢真係有潛質架！而且仲好後生，對於年紀輕輕就由修咸頓到曼聯嘅佢而言，日子真係唔易過架。梳爾得20歲仔，有幾多個球員咁細個就打緊英超先得架？」
回想上季同一個時間，雲帥對佢其實都好harsh架，話佢唔夠fit，唔可以做到雲帥的要求，要佢自己一個操fit自己直到合格為止。而梳爾又好乖乖咁，真係操多幾課！不過唔好彩，成日傷，最後只為曼聯上陣15次咁大把。佢都知唔可以重蹈覆轍，季前乖乖自己操，輕咗成3公斤、有哂成績架！單由雲帥的意見就知，佢對梳爾確係改觀咗，亦對佢嘅努力好讚賞，希望真係誠佢所言，今季有個「梳爾天下」啦！