被英足總起訴 伊雲斯：我無吐口水！

曼聯周三晌聯賽作客1:0擊敗紐卡素嘅比賽，伊雲斯同對方前鋒柏比斯施斯被影到晌一次搶截時正吐口水，先係伊雲斯晌施斯吐口水，施斯之後還拖向對方回敬，雖然當時球證睇唔到，無俾埋警告佢哋，之不過佢哋整個過程，就被電視鏡頭拍低。英足總已經就互吐口水事件向二人作出起訴，兩人好大機會面對停賽6-7場嘅處罰。
https://www.youtube.com/watch?v=8XvMhGWkEmE
雖然影到，之不過雲高爾同伊雲斯本人都表示無呢件事發生，曼聯領隊雲高爾賽後曾為伊雲斯辯護：「我晌後備席睇唔到事發情況，但我唔相信佢會咁樣做。」而伊雲斯個人亦公開否認自己有做過，「睇到個個傳媒都報導關於自己嘅新聞，感到好震驚，我希望講清楚就係，我無晌施斯吐口水，我甚至完全唔知啲人講緊啲咩。吐口水唔係我作風，我從來唔會做出呢啲舉動。」

之不過另一個當事人施斯就親自對呢件事道歉：「做出呢種行為，好對唔住，我首先對唔住我嘅隊友同支持者，其次係伊雲斯以及任何一個晌電視機前睇到這一幕嘅人。我當時好嬲，有時係好難晌呢種情況下保持冷靜，我一直好希望成為年青球迷榜樣，所以好對唔住，我嘅行為令大家失望。」