蘇B係「造王者」?喚醒福仔、渣古之後到「佢」?

曼聯專區 於 03/01/2019 發表 收藏文章
同一班人腳,唔同嘅戰術心態,效果可以非常明顯。單係講賽後呢段片,已經睇得出蘇B嘅領軍方針:完場之後唔會黑住面入更衣室,反而會逐個球員握手鼓勵一下,同球迷say yeah 鼓動一下,親民度爆燈,亦可以預期球員同佢關係會比較好。

而戰術上亦同「大巴年代」好唔同,俾前線球員大啲自由度、多啲解放創造力,第一個受惠嘅就係福仔。計計數,睇下平均每場嘅數據,大家就睇到依家嘅福仔威脅大咗幾多:

摩帥年代:攻門1.9次,中龍1.2次,盤球1.2次,禁區觸球4.3次
蘇B年代:攻門4.1次,中龍2.3次,盤球2.3次,禁區觸球8..7次

只係睇般尼茅夫一役,佢已經有23次衝刺嘅紀錄,更被蘇B大讚佢:「緊逼對手,追逐皮球,找尋空位。佢有齊成為世界級前鋒嘅所有潛質。」單係福仔自己已經受益於戰術嘅改變,盧卡古短短2次嘅後備入替亦都搵返門前銳利觸覺,咁原本已經證明自己係世界級攻擊球員嘅「佢」又會點呢?

「佢」就係山齊士,蘇B在對紐卡素賽前已經認為自己有能力喚醒埋呢位智利戰將:「我認為山神可以受惠於球隊的走位、位置互換、與及行軍。製造到越多機會,放越多波上去前半場,越能夠反映佢係隊中重要資產。我好期望山神表現,訓練課時佢攻入幾球靚波,令人好鼓舞。」

最終後備上陣嘅佢,亦真係貢獻到一次助攻,為曼聯奠勝。上兩篇評論已經分析過,依家防線前推,中前場連繫多咗,支援進攻嘅人多咗,對方守將疲於奔命,如果加埋山齊士入去,猶如放多隻老虎入中前場。支援多咗又唔駛兼顧防務,山齊士有無機會再一次大爆發?加盟以來從來無機會同福仔、馬迪爾、連加特夾默契嘅佢,又會唔會喺戰場上同隊友搵到合拍嘅地方,進一步加強攻力?

數數手指,加埋山神前線人手真係夠晒有突,用呢一班人馬去挑戰幾線盃賽聯賽,睇嚟都夠。好似下場FA CUP對雷丁,蘇B已經唔駛用盡馬迪爾福仔,大可以俾山神、渣古上陣「以戰養戰」搵返球感,打返起2位世界級戰將,對熱刺時點將就點揀都得!

如果喜歡我們的文章,請即分享到︰

標籤: 山齊士  

留言

會員
我要評論
請按此登錄後留言。未成為會員? 立即註冊
  • X KeViN X
    X KeViN X 於 04/01/2019 評論 NO. 1

    q.v.

  • Tsang Jimmy
    Tsang Jimmy 於 06/01/2019 評論 NO. 2

    今晚對雷丁,山齊士又一次助攻啦

快捷鍵:←
快捷鍵:→