朗尼：呢一分將會係曼聯贏取聯賽冠軍的一分！ 精選

尋晚場比賽係唔係睇到大家抖唔到氣呢？曼聯上半場先失伊雲斯嘅烏龍波，下半場都未企穩就再被馬達、雷斯攻入兩球，面對3:0的戰局，曼聯追下一球、追下又一球，終於在朗尼的兩個十二碼及小豆的頭鎚之下追和車路士取得一分。雖然賽後又被曼城拋離2分，不過陣中各人都非常滿意今仗的表現。
我知你哋無心機喇...不過無計啦！你哋對曼聯！
入波功臣之一朗尼就咁講：「我感覺我哋戰至最後一刻而取得嘅呢分將會幫我哋贏到聯賽冠軍！好多隊伍輸到3球時都會垂頭喪氣、接受命運，不過我哋無放棄，一直努力，最後終於有回報。嗰時係球場上，我哋知道追返一球就有機會扭轉成個局面，所以我哋一啲都無手軟。

可能你會認為曼聯失掉2分，呢個都係事實，我哋明白。不過有睇呢仗的曼城球員一定會留下深刻的烙印，睇住我哋由輸3:0追到和波，佢哋嘅心理一定受影響。呢場波充分反映曼聯打不死嘅精神，唔單止一場波而係整個球季。我哋會好似對車仔咁，一直壓逼曼城到最後一刻，你哋等住接招啦！」
其實朗尼操刀時都驚驚哋！佢今季射失唔少12碼！
爵爺當然都好滿意，佢表示：「要係車仔身上追到3個波實在唔易。今仗紅魔的表現決非真正曼聯的實力，我哋可以做得更好，不過球員的精神面貌大家可以清楚見到。你必須承認隊伍有勇氣、有性格，因為呢兩樣嘢就係曼聯與別不同的地方。」

呢種打不死精神確係無堅不摧！所以今季聯賽冠軍誰屬，真係要鬥到最後先知架！唔知曼城又有無同樣嘅韌力支持到最後呢？大家睇落去啦！