曼聯專區小評:解構米希達利恩

曼聯專區 於 23/08/2016 發表 收藏文章
4大新將入面,暫時未係好企得住腳嘅係上季多蒙特助攻王米希達利恩,睇幾場波摩帥都係用佢換入馬達,睇佢身體語言好似唔係幾有信心,好似有啲迷咁。佢嘅前隊友根度簡就講過,其實米希達利恩好慢熱,係一個好需要時間去建立信心嘅人:「米希達利恩喺多蒙特3年,老老實實,頭2年佢都唔太好過。佢係一個好需要自信嘅球員,要個個星期落場踢、去證明自己有能力,佢先會越來越進步。呢一刻佢唔太成功,於是就影響佢適應新生活。毫無疑問佢依家係有問題,不過你睇佢上年嘅叻叻表現,我可以話佢係我哋當中最重要的球員之一。如果佢可以返到呢個信心水平,佢就可以為曼聯帶來好大的衝擊,成為一個關鍵人物。」

其實米希達利恩出生自足球世家,仲有少少悲劇色彩添。佢爸爸係一位前鋒,職業生涯中上陣三百幾場賽事攻入過百幾球;佢媽媽係亞美尼亞足協的職員;更有個妹妹幫緊歐洲足協打工,成家人都同足球有關。佢好受爸爸影響,只不過佢已經無辦法再同爸爸一齊踢波,因為「米爸」33歲時患上腦癌已經撒手塵寰,當然米希達利恩仍然好掛住爸爸啦:「佢係我嘅帶領者,係我嘅動力來源,我細細個時佢已經係職業球員,我總係幻想可以同佢在訓練場上一齊操練。我好希望可以繼承佢嘅工作,繼承佢作為一個球員的夢想,雖然佢嘅離世好可惜,不過呢個就係生命,我哋都要繼續生活。我盡一切努力令佢感到自豪,希望佢在天之靈都會睇得到啦。我成日都睇佢比賽啲片段,不過足球已經改變好多,我依家睇都只係回顧下佢嘅打法,無辦法用返喺場上。其實都幾傷心,我一直認為佢會支持我、鼓勵我。佢嘅死一方面令我加速成長,不過另一方面亦令我成長困難,因為無一個爸爸、無一個真男人去畀紀律你,去畀方向你。呢個時候我媽媽母兼父職,所以我真係好多謝佢。」

至於佢去曼聯,都好明白條路一定好難行,亦表現出佢嘅自信真係麻麻:「我從來唔會應承人,我只會話我會盡力嘗試。因為你應承人但係做唔到,只會令自己壓力增加。每次香川真司同我講到曼聯,佢都帶畀我正面感覺,不過佢亦有講到我必須盡力做好一切,否則只有離開一途。我知唔會有人保證我嘅位置,我要盡力嘗試自可以得到正選之位。不過我都喜歡困難嘅挑戰,因為你戰勝佢,你就會變得更強。」

依家佢面對嘅困難,正正就係一位強大的球員擋在身前,佢就係馬達喇。當大家都認為米希達利恩一定會取代馬達,呢個時候返而係米希達利恩淪為後備。摩連奴有解過話,話第一場聯賽佢用馬達係因為預計般尼茅夫會谷前,想用馬達攝對手後防空位。不過點都好,其實摩帥都係希望用最好的球員對應不同情況,呢一刻米希達利恩可能無咩信心、無咩狀態,摩帥先暫時唔重用,不過只係睇佢對修咸頓時後備上陣嘅20分鐘左右,已經見到佢同馬達的分別:馬達打法好優雅,傳送都好準,只係皮球於佢腳下節奏就會變得慢,侵略性略為不足。反之,米希達利恩只係上陣20分鐘唔夠,交出的6腳傳送悉數都係向前交嘅,尤其一次打反擊時傳送畀普巴最為耀眼。更重要嘅係,佢唔單止可以打中間嘅攻擊球員,更多人期望佢打返熟悉的右路,同埋華倫西亞組成又快又有殺傷力嘅右路攻擊線。大家記得畀啲時間,睇下呢位亞美尼亞人點樣加強曼聯嘅攻擊線啦!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • Edward Yu
    Edward Yu 於 24/08/2016 評論 NO. 1

    試下佢打右 中間用馬達

  • 黃鏋霖
    黃鏋霖 於 24/08/2016 評論 NO. 2

    慢熱?肥仔阻住晒咋

  • Dung Derek
    Dung Derek 於 24/08/2016 評論 NO. 3

    朗尼好勁架 球皇級球星差個國際榮耀咋 朗尼個d斬波曼聯陣中冇人做到
    Ps 曲線要說明

  • Cyrus Chai
    Cyrus Chai 於 24/08/2016 評論 NO. 4

    其實mk仔如果操番好個態,前場乜位都踢得
    出mata 踢中,佢踢右,不時swap
    已經有奪冠本錢
    不過要踢走朗肥。。。

  • Johnny Leung
    Johnny Leung 於 24/08/2016 評論 NO. 5

    練完放守先有正選🙈😁🤔

  • wahdee1115
    wahdee1115 於 24/08/2016 評論 NO. 6

    其實摩佬好鍾愛朗肥,出米希只會收起馬達,除非朗肥提早收咧

  • Wai Nok Enoch Lee
    Wai Nok Enoch Lee 於 24/08/2016 評論 NO. 7

    香川好慘

快捷鍵:←
快捷鍵:→