曼聯專區小評:普巴要犧牲小我,先可以完成偉業!

曼聯專區 於 23/07/2018 發表 收藏文章
天使與魔鬼的共同體,其中又點止伊巴一人,普巴都絕對係表表者。有評論講過,甚至估過爵爺之所以唔用普巴,係因為佢非常「大細路」,律己唔夠嚴,唔肯乖乖哋實行領隊俾出嚟嘅指示,令佢打唔出應有水準。喜歡dab、喜歡載歌載舞都唔係一個問題,但喜歡獨立特行,就限制咗佢喺球場上嘅表現。

最近傳媒爆料,原來摩連奴同迪甘斯有詳談過普巴的「戰略意義」,因為呢位法國球星不止在球會,更在國家隊表示過自己想打433陣式中嘅左中場位置,想自己進攻多啲,唔想防守。但原來2位名領隊都不約而同地拒絕咗普巴。但係點解呢?佢哋睇到啲咩呢?答案可能要問另一位法國人皮利斯。

皮利斯咁樣評普巴:「對秘魯一戰普巴表現最為成熟,佢完全主宰球賽。當時佢打簡單足球,非常有效率,甚至稱得上控制了整個上半場嘅節奏。下半場法國將防線壓後時,普巴表現出嘅防守力亦係非同一般。442陣式之下,普巴同尼高路簡迪分擔更多防守責任,相比起433陣式俾普巴太多空間了。442先啱佢,普巴係要俾心機精神去防守先發揮到力量,因為佢係世上最好嘅中場之一,有球在腳時你根本唔需要為佢擔心。」

無錯,其實普巴發揮唔到在於一個好簡單的原因:唔乖。以佢嘅身型、腳法,保護皮球嘅能力,絕對係一等一嘅中場球員。不過佢唔係一位出色嘅攻擊球員,比起馬迪爾、福仔,佢嘅單對單突破能力無得比;比起盧卡古、伊巴,佢嘅埋門能力亦唔見得好。但身在中場中,走上走落去破壞對方控球權,控制攻守節奏、指揮進攻,甚而係中遠距離的射門都非常出色。有佢鎮守中場,其實隊友個心好定當。

只不過佢又真係好大細路,要威要出名,要入波要歡呼,所以一直都只係想打進攻位置,要揚名立萬成關鍵人物。更大件事係,佢只係著眼於大戰同可以「響朵」嘅賽事,變相對陣中小型班就行行企企唔願走多步,令外間對佢嘅期待一一落空,亦令佢嘅表現越來越唔穩定。但無論係摩連奴、迪甘斯定係皮利斯,都明白放任佢想點就點,對球隊對國家隊都唔係好事。

打國家隊,為國打超正經賽事,乖咗嘅普巴表現可圈可點。但一返到曼聯,又會係咩光景?如果佢恃住「我拎過世界盃,我是王」嘅態度,咁睇嚟曼聯今季都係無爭標之相;相反如果佢終於明白犧牲自己一時嘅榮辱先係正確態度,乖乖哋腳踏實地打實而不華的足球,同馬迪穩住曼聯中場線,有佢帶領嘅曼聯絕對可以行遠好多!



如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 林公子遊誌
    林公子遊誌 於 25/07/2018 評論 NO. 1

    年少自大狂,仲有2,3年可以浪費
    之後仲唔醒水或專心踢,好快又消失

快捷鍵:←
快捷鍵:→