曼聯專區小評:1+1大過2!

曼聯專區 於 14/08/2017 發表 收藏文章
唔講唔知,原來昨晚的比賽係2014年以來曼聯贏得最大比數嘅聯賽比賽。而且更令人開心嘅係,呢場大勝真係有說服力,4個入波運氣成份都唔高、都係組織同個人能力嘅配合,呢種穩打穩紮穩贏嘅感覺真係好耐無試過喇!

之但係細睇之下,今場曼聯其實只有2個新面孔,就係盧卡古同埋馬迪。不過唔好睇呢個「1+1」組合,其實佢哋為曼聯帶來好大嘅協同效應,如果呢個化學作用進一步強化,今季曼聯絕對有力問鼎英超。首先係盧卡古2球都係表現出自己最大優勢:真正嘅步大力雄、力的表現。第一球入球力爆對手後衛再起腳,皮球中柱再彈入,整個過程迅雷不及掩耳,由球速已可見盧卡古腳頭有幾勁。而佢嘅短程爆發力亦成為後衛嘅惡夢,又快又撞得,要頂住佢嘅突擊真係一啲都唔易。第二球入波唔係爆發力嘅表現,而係身型同身位優勢,米九嘅高度要成功制空唔難,加上大大份嘅身型,呢招係「新魔獸」嘅另一殺著。配備速度、身位、力量,令盧卡古大大加強曼聯前線嘅銳利度。

至於馬迪,佢就更加係曼聯陣中最為發光發亮嘅球員,賽後唔少網站都畀十分滿分畀佢。講觸球次數、講傳球次數、講爭波成功率,去到盤球走動次數,佢都係冠絕曼聯一眾球員。第一球、第四球入波嘅起動點都係馬迪,而更重要嘅係有佢鎮守中場,正正解放普巴呢位天價球員。成場比賽佢交波畀普巴就有14腳之多,無咗後顧之憂嘅普巴更加多咗上中前場爭逐,最終取得一個入球。連帶米希達利恩都受惠於馬迪嘅支援,放手上前幫手,取得2個助攻。

早係幾日前舒利亞就評論過英超今季形勢,雖然佢一直都對曼聯無咩好感,但係佢都貼曼聯可以贏到今季英超,原因正正就係盧卡古同馬迪。佢2日前嘅說話,預言咗曼聯昨晚嘅勝仗:「盧卡古只有24歲,佢喺曼聯只會變得更強。連續5季都有穩定入球數,只要其他球員畀到機會佢,仍入唔入到波根本毫無懸念。更重要係馬迪,我仍然好驚訝點解車仔會放人,報道話連干地自己都唔知點解球會竟然首肯。佢起碼仲有2、3年巔峰,有佢就可以解放普巴,畀更多自由佢發揮,我可以預見普巴會有進步。而米希達利恩、拉舒福特都一樣會受惠。呢個組合令摩帥搵到取勝之道,所以我睇好今季曼聯會以些微之差贏得英超冠軍。」

所以呢個就係1+1大過2嘅原因,上季好多比賽入唔夠波、打和收場,有盧卡古就有能力突破;而上季中場唔夠人爭嘅情況,亦有馬迪幫幫手,前利物浦球員兼前教練嘅桑拿士更大大讚賞馬迪為「現役最強holding midfield player」。更重要係有佢哋在陣,其他球員就可以更有效發揮自己長處,打出比上季更好嘅水準,你話今季曼聯點會唔恐怖!

標籤: 曼聯專區小評  盧卡古  馬迪  

留言


請按此登錄後留言。未成為會員? 立即註冊
  • Yong Yuhan 於 14/08/2017 評論 NO. 1

    理性D都系一场波,咪入波之前都系打到老鼠拉龟... 不过人脚齐,就多D 变化同选择...

  • 火爆火 於 14/08/2017 評論 NO. 2

    只是贏一場,而且熱身賽對皇馬,巴塞都唔得強,所以不要太興奮,不過盧卡古真的幾利害,除非冇進步,過兩年,皇馬3億搶人,利申曼迷。

  • yamato2008 於 14/08/2017 評論 NO. 3

    再簽入直路飛,會強化

    能強化「魔獸」的迪路菲奧
    http://s.fanpiece.com/RaY1Rlb

  • 公証大磅 於 15/08/2017 評論 NO. 4

    正如比歷賽後所言,紅魔在各個環節都勝過錘仔幫。盤扭,攔截,無球走動,隊形位置,進攻組織及速度,控球節奏在這場比賽都明顯比過往幾季有所進步。有人説打來沒悦目組織,這顯然是偏見,君不見四個入球都與組織默契有關嗎?第—場比賽而且還有新隊員加入,已見有如此默契,如此的立體埋門效果,假如繼續有所進步,奪標確可期待。衹是今埸比賽,後防未受考驗,爭冠希望可能還看這方面的造化了。

  • 李奧152 於 16/08/2017 評論 NO. 5

    對強隊...先講喇!普巴盧卡古出晒名強隊隱形!不過改善到對弱隊唔好失分都好既!始終英超驚喜萬fun弱隊都成日偷雞!

快捷鍵:←
快捷鍵:→