曼聯專區小評:買雲比沙卡有用咩...?

曼聯專區 於 28/06/2019 發表 收藏文章
雲比沙卡成魔在即,討論當然無可避免。而聽到網民最多嘅評價係:「5000萬鎊?值唔值呀?」或者係:「又買閘?買中堅好過啦!」呢度就等我哋細睇下呢位小將點解得到蘇B垂青?

先睇下數字,BT sports幫大家計過數,如果只係比較閘位球員,上季雲比沙卡嘅數據可謂非常驚人:129次大腳清波、129次攔截成功都係英超第一,鏟截成功率更高達94%;阻截對方傳送嘅數字亦係英超之冠。不過講到其他數字佢就差啲,傳送準繩度、助攻比率,都似乎偏低。由此可見,呢位小將係偏向全面防守形嘅悍將式閘位球員。你唔好旨意佢出球靚波助攻,但有佢留守大後方,其實幾心安。

睇完佢嘅本質,係時候分析下佢喺隊入面嘅位置。大家都睇得到,佢同達洛治2個右閘,正正係對應緊唔同嘅對手、唔同嘅戰術。首先唔少網民都認為達洛治打翼好過打閘,因為佢助攻能力、腳法速度都較好,所以當曼聯對住鐵桶陣球隊,或者攻力較疲弱嘅球隊,就可以用達洛治力爆右路,成為另一進攻板斧。反之,面對勁旅、面對侵略性非常高嘅球隊,又或者需要保住戰果堅守陣地嘅情況,雲比沙卡變相就啱用好多:助攻唔好預佢,等佢好好搞破壞就夠。

當然筆者仲有一個想法,就係轉型啦!既然助攻並非雲比沙卡嘅強項,而佢183CM嘅身高亦唔算太輸蝕,有無可能將佢打造成中堅後補,當中堅有咩傷病時移入中路呢?如果表現出色,取而代之長打中間亦無不可!所以話,呢個5000萬鎊買嘅隨時係一個潛在中堅都未定!不過當然大家先好好期待佢強化右路防守嘅表現啦!

留言


請按此登錄後留言。未成為會員? 立即註冊
  • 可愛女孩@@ 於 28/06/2019 評論 NO. 1

    改3中堅讓他踢右中堅?🤣

快捷鍵:←
快捷鍵:→