曼聯專區小評:談曼聯新亂象之後防

曼聯專區 於 02/08/2018 發表 收藏文章
上回講到迪基亞「單天保至尊」,一人撐起上季嘅曼聯防守工作,後防亂象係唔係已經增加緊呢?其實摩連奴接手之後防守算係改善咗少少,而佢買入嘅艾歷拜利應記一功。無計,鍾斯傷患頻仍;史摩寧穩定性不足;盧祖未見突出;連迪路夫水準麻麻,後防線其實都幾天殘地缺。不過好在有艾歷拜利在陣,佢位置感、穩定性都比同儕出色,但最大嘅資產係信心同埋冷靜。面對強隊壓力、大戰壓力,都唔太影響拜利嘅表現,甚至佢仲敢喺自己後場玩下花招,但腳法穩健、保護皮球能力亦強嘅佢,玩出火嘅機會真係算少。而佢亦有一定閱讀球賽能力,連繫中後場方面做得唔錯,依家已經係曼聯後防嘅定心丸之一。

但拜利都有佢嘅弱點,就係少少玻璃腳加體能有待改善。佢當然無鍾斯傷得咁多,不過久唔久都會缺陣一兩個星期,不幸中嘅大幸係佢表現尚算穩定,傷癒後發揮都唔太受影響。但過去2年佢只係上陣過38場比賽,可見佢體能同體質都仲可以更好。當然,身為科特迪瓦國家隊成員,年初要打非洲國家盃亦令佢少咗為球隊貢獻。

其實衰嘢都唔駛點講,近期嘅傳聞指摩帥有機會由史摩寧、盧祖入手「清瘀」,亦可見摩帥都明唔可以俾迪基亞咁「赤裸裸」面對對手攻勢。而要加強己隊有咩選擇呢?哈利麥古利(Harry Maguire)傳咗一排,但最近幾日已經可能性大減,有傳李城會俾一份新約佢添。所以最新消息,指曼聯已經轉而青睞哥倫比亞後衛耶利文拿(Yerry Mina)。

大家認識耶利文拿,除咗因為佢效力巴塞之外,更因為世界盃16強一記球槌逼和英軍,拉一眾三獅入12碼決勝大戰當中。不過傳聞中只要3000萬鎊就買到佢,點解呢個號稱「世界盃新貴」咁平?原因係,佢打巴塞表現真係一鑊粥。睇數字就知,巴塞上季38場賽事共失29球,當中有7球就係耶利文拿上陣時所失嘅,達失球數嘅1/4!而西班牙傳媒都對佢好不留情面,巴塞敗陣利雲特5:4嘅比賽之後,直情形容佢「好似無影」一樣。點解摩連奴要買佢呢?

其實文拿喺巴塞最大問題係走位成日錯哂,面對反擊時更成日手足無措,甚至有部分曼聯高層都認為佢唔會比現有後衛球員好,諗唔到要買佢嘅原因。要買文拿,唯二可取嘅就係佢身體抗性幾好,喺英超打會有少少優勢;同埋頭槌攻擊能力頗為出色,世界盃亦印證咗呢一點。但筆者認為,市面上無咩好揀亦都係主因,摩帥可能睇中文拿「發展空間頗大」而想買佢,不過有得揀,佢首選一定係哈利麥古利。

照咁睇,曼聯呢一季後防會點?萬一有咩人事變動,令一眾守將默契下降、打唔出水準,買人又唔係好買到出色後衛,睇嚟迪基亞又要嚟多一季「單天保至尊」喇……

標籤: 曼聯專區小評  

留言


請按此登錄後留言。未成為會員? 立即註冊
  • tinchi3721 於 02/08/2018 評論 NO. 1

    摩佬買同訓練防守球員係有1手的

快捷鍵:←
快捷鍵:→