曼聯專區小評：終極幻想！無朗尼的曼聯？ 精選

聽下球迷聲音，唔難發現大家都對態沉嘅朗尼有啲不滿，無他嘅，打前鋒佢嘅觸覺仍然都好強，不過講速度、控球，佢同巔峰時期都真係有一段距離。依家佢同「後謝拉特時期」嘅神奇隊長都有啲似，同樣都係球隊的靈魂人物，不過狀態就有啲飄忽，你唔用佢咩？又好似隊波無咗個大佬咁；用呢？又有啲四不像…如果、假如、真係、或者、可能，將朗尼踢出正選之外的話，會對陣式有咩影響呢？

無錯，第一個反應一定係呢件事發生：開季至今入5球嘅馬迪爾，只係用9場波就入波多過上季法卡奧嘅佢依家其實唔係打正前鋒，而係左翼位。唔係唔得，佢又快又扭得，幾場都見到佢制霸對手右路防線，係好有用，不過見到呢位「新亨利」嘅冷靜，大家都想睇佢喺禁區蹂躪門將多啲(笑)。朗尼唔打前鋒喇wor，呢個單箭頭位置真係非馬迪爾莫屬啦！有呢把新尖刀，攻力？唔擔心嘅！
好，咁左路可以用邊個？唔需要太擔心，人選真係唔少！當然有大家最喜愛嘅楊格啦！速度固然唔駛擔心，cut入禁區、斬波佢都有一定功架，當然攻門都得啦！不過除咗佢，當然仲有新將迪比啦。仲係好後生嘅佢潛力係有嘅，荷甲都打出身價，其突破力、創造力都有，只係對於英超仲要啲時間適應，加上份人都獨食，同球隊的磨合做得麻麻…如果佢可以融入球隊，其實亦係一個好選擇！

咁右邊呢？你可能會話馬達咪打得幾好，咁當然佢都可以繼續發揮啦！有靴里拉喺中場同佢合作，中、右路攻擊線應該無咩問題，不過筆者反而想提下華倫西亞。對中央陸軍一役，可能係輪換啦，佢代替達美安打右閘，最大的亮點卻變成助攻，10次斬波4次交到腳，當中一腳就成為馬迪爾的助攻，保住一分。你話佢值唔值得正選？其實都可以架！
順理成章，華倫西亞打右的話馬達就可以打10號位喇，當然呢個位置靴里拉都適合啦，不過二人可以輪換，又或者靴里拉、馬達放在攻擊中場的位置，組成4141陣式，又未嘗不可噃！防中，筆者首選就係舒尼達連啦！小豬同卡域克其實都得，只係二人速度比較慢，喺英超真係有啲濕滯…

當然，如果真係要揀，筆者都會想有隊高速、高壓迫力嘅曼聯，無朗尼為前題之下，心水陣式會唔會係咁呢？

門將：迪基亞
後衛：達美安、史摩寧、鍾斯、白蘭特
防守中場：舒尼達連
攻擊中場：華倫西亞、馬達、靴里拉、迪比
前鋒：馬迪爾
不過...最好，梗係朗尼打返出水準啦！呢個我諗你撐朗反朗，見到朗尼場場有波入都應該開心嘅！佢場場有波入，即係曼聯場場都創造到機會，勝算自然都大咗啦！