佢唔介意做普巴身後的男人 精選

「佢」真係唔介意。佢接受訪問時仲咁講：「普巴好強壯…」咁樣會唔會令大家誤會架？有古希臘城邦認為愛的力量係最大嘅，所以軍隊都搵一對對嘅同性戀人出戰，唔通連曼聯都開始有呢一種情況…？

大家唔好諗多咗，「佢」話要做普巴身後的男人，係真係字面上「身後」，普巴打中場，佢就打防中嘅意思！佢係邊個？就連筆者都講過佢係「解放普巴」的人，有佢幫幫手普巴就唔怕上前盡情進攻嘅靴里拉喇！佢咁講：「普巴真係好強壯，好體力化，而且左右腳都可以攻門。佢可以盤扭，又可以防守，非常全面。所以我唔介意溜後，偷波、補位，成為進攻的第一點。我感覺良好，會跟領隊指示盡我所能。我好重視團隊，所以我會聽摩帥講，亦會好開心留在防中位置。我需要一致性，我知我要好努力去得到摩帥的信任。不過老實講，我好鍾意我嘅新位置，亦有估過係唔係我嘅位置改變成為契機，令我可以加入西班牙國家隊。」
當然，之前見開靴里拉都係打中場中多，無得參與咁多進攻有咩影響呢？其實佢都對呢個位置有少少留戀架：「跟住摩連奴會有好多機會，我就喺聯賽盃打過進攻中場，仲有入波添！不過做防中我真係唔介意嘅，同埋我有個好好嘅老師卡域克，過去10年佢都係世界上最數一數二嘅防中之一，我會跟佢學嘢！」係啦，乖乖哋做普巴身後的男人，同普巴拍住上咪幾好~