態度問題? 前阿根廷國腳狠批加拿祖：「太自以為是，做人要貼地！」 精選

阿根廷翼鋒加拿祖今季轉投車路士後表現平平，自從由曼聯加盟以來，似乎仲未完全適應藍軍嘅節奏。而且自從 2024 年 11 月之後，阿根廷主帥史卡朗尼 (Lionel Scaloni) 一直無再徵召加拿祖入國家隊。

前阿根廷國腳、1986年世界盃冠軍成員 Oscar Ruggeri 早前喺 ESPN 接受訪問時，就毫不留情咁評論呢位後輩嘅態度。

Ruggeri 認為，呢位年輕翼鋒有巨大潛力，但必須盡快改變態度，否則難以進一步突破。


「佢唔比人叻，你只係一個球員，應該享受足球，但唔應該太自以為是。太過自滿只會錯過好多嘢，真係要有人令佢貼返地。」

「國家隊而家都冇揀佢。如果佢可以好似以前咁踏實，貼返地，佢一定會再被徵召，因為佢喺球場上真係一個好出色嘅球員。」


想重返國家隊？加拿祖要用表現說話

加拿祖現時為車路士上陣 7 場，共踢咗 331 分鐘。喺上週末對新特蘭嘅比賽入咗加盟以來第一球，即使球隊最終落敗，都希望佢藉呢個入球重新搶回信心，爭取再次入選阿根廷國家隊，備戰下一屆世界盃。