2018年J1第28輪總結：川崎爬頭上榜首 精選

颱風吹襲日本令今輪J1有2場比賽要延期，同時今輪之後榜首同下游亦嚟個大風吹。廣島三箭作客不敵大阪飛腳，同時川崎前鋒擊敗長崎勝利丸，川崎追到同廣島同分，並以較佳得失球差終於搶走廣島磐據接近半年嘅榜首席位。而鹿島鹿角亦乘近期勇態大勝有恩尼斯達繼續缺陣嘅神戶勝利船，亦乘FC東京再敗一仗，以1分優勢反壓東京升上第3位。

護級形勢方面，長崎輸波繼續包尾，柏雷素爾同鳥栖砂岩同樣攞唔到分，而湘南比馬及名古屋鯨魚就因為打風未踢今輪比賽，令飛腳全取3分之後彈上第13位，上季殿軍柏雷素爾跌落尾二，鳥栖順落尾三。橫濱水手再次大勝仙台維加泰之後亦升上第11位。不過由第8位清水心跳至尾二柏雷素爾之間只係相差7分，所以仍然有好多隊未解決危機。
Opta今輪數據

1.興梠慎三（浦和）- 三哥今輪梅開二度協助球隊贏波升上第6位，亦令佢以13個入波同小林悠並列今季目前喺J1入波最多嘅日本球員，同時64.6%射門中框率及22%射門得手比率，亦係日本球員當中排第1位。

2.都倉賢（札幌）- 今輪喺補時5分鐘入波絕殺鳥栖，係都倉賢今季第5個補時階段入波，成為今季J1下半場補時入波最多球員。

3.山中亮輔（水手）- 今輪再射入一個遠程炮，係佢今季第4個禁區外入波，亦係今季J1目前禁區外入波最多球員。
4.川崎前鋒 - 今輪擊敗長崎升上榜首，係今季第16次先開紀錄賽事嘅第13次贏波，今季開紀錄下亦只得1敗。而作客先開紀錄嘅6場比賽亦取得5勝1和不敗。

5.長崎勝利丸 - 相反長崎今場係今季第13次畀對手先開紀錄嘅成績係全敗。

6.神戶勝利船 - 今輪再大敗一仗，令神戶喺J League史上失4球或以上輸波場數達27場，冠絕J League。

7.橫濱水手 - 繼首循環贏8：2之後，水手今輪又以5：2大勝仙台維加泰，今季兩循環夾埋入咗仙台13球，超越上季浦和兩循環入咗仙台10球，成為J1史上兩循環入得對手最多波嘅對決。

長崎勝利丸 1：2 川崎前鋒
https://www.youtube.com/watch?v=RDwRvBO6IyE
大阪飛腳 1：0 廣島三箭
https://www.youtube.com/watch?v=AISQPzJTVgM
神戶勝利船 0：4 鹿島鹿角
https://www.youtube.com/watch?v=16Rsntv-f7Q
FC東京 0：2 清水心跳
https://www.youtube.com/watch?v=fJT0Bdf7fYQ
北海道札幌岡薩多 2：1 鳥栖砂岩
https://www.youtube.com/watch?v=d9YPplXDweM
浦和紅鑽 3：2 柏雷素爾
https://www.youtube.com/watch?v=KjCFAC9gFF4
橫濱水手 5：2 仙台維加泰
https://www.youtube.com/watch?v=nS1z8b8zpGo
大阪櫻花VS名古屋鯨魚及磐田山葉VS湘南比馬延期

#北海道コンサドーレ札幌 #ベガルタ仙台 #鹿島アントラーズ #浦和レッズ #柏レイソル #FC東京 #川崎フロンターレ #横浜Fマリノス #湘南ベルマーレ #清水エスパルス #ジュビロ磐田 #名古屋グランパス #ガンバ大阪 #セレッソ大阪 #ヴィッセル神戸 #サンフレッチェ広島 #サガン鳥栖 #Vファーレン長崎 #Jリーグ

圖片：JリーグOfficial site
資料來源：J League情報站
https://www.facebook.com/jleagueinfo/