2018年J1第15輪賽事總結 精選

廣島三箭喺夏休之前終於受挫，今輪喺主場久攻不下，反而喺完場前3分鐘內畀高木俊幸連入兩球，最終以0：2不敵大阪櫻花，吞咗今季第2場聯賽敗仗。由於第2位FC東京今輪再以0：0和波，賽前排第3位嘅北海道札幌岡薩多作客慘吞神戶勝利船4蛋，11場不敗走勢告終，令廣島仍然有9分領先優勢帶到7月。東京繼續排第2位，有中村憲剛梅開二度嘅川崎前鋒贏波之後升上第3位，櫻花亦升上第4位，札幌跌落第5位。

榜尾護級形勢方面，名古屋鯨魚主場再輸一場，繼續以9分包尾，柏雷素爾雖然擊敗名古屋，但係門將中村航輔同祖奧相撞導致頸部先落地，仲一度失去意識，要立即送院急救。好彩之後回復清醒，會唔會影響到踢世界盃決賽周就要繼續觀察。 尾二鳥栖砂岩、尾三大阪飛腳今輪都和波得分，令名古屋同安全線距離再拉遠。賽前排尾四嘅橫濱水手喺護級大戰擊敗長崎勝利丸，令水手得以升上第13位，長崎跌落尾四，只領先飛腳2分，浦和同飛腳和波之後就排尾五，水手、浦和同長崎3隊同分。
J1踢完今輪之後要等到7月18號先再開，日本國家隊將會喺今日開操，世界盃決賽周之路正式展開。不過日本足球壇仍然好熱鬧，因為J1球隊嚟緊6月仲要踢聯賽盃附加賽同天皇盃第2圈賽事，J2同J3更加係繼續Keep住踢落去唔會休息，奧運隊亦喺下禮拜一開始踢土倫盃，所以要睇日本波絕對唔愁冇機會。

Opta今輪數據

1.威靈頓（神戶）- 呢名今季從福岡黃蜂加盟嘅巴西前鋒，近兩仗終於復任正選，今輪仲以2個入球同2次助攻協助球隊大勝，佢亦成為今季目前為止唯一一場製造4個入波嘅J1球員

2.高木俊幸（櫻花）- 呢名靚仔翼鋒今輪梅開二度協助球隊擊退廣島，佢亦喺櫻花近5個入波之中參與咗4個（2個入球+2次助攻），狀態相當唔錯
3.中村憲剛（川崎）- 或者今輪一心要踢好波月獻畀早幾日過身嘅西城秀樹，所以Kengo今輪大發神威梅開二度，亦係呢名老將自2年2個月以嚟首次梅開二度

4.江坂任（柏）- 同樣近況勇銳嘅仲有江坂任，連埋今輪梅開二度，柏市近6個入波佢入咗4個，同時呢4個入波只係用咗6次射門就搞掂

5.新里亮（磐田）- 呢名今季由甲府風林轉投磐田嘅中堅，計埋今輪合共有55次爭頂高波得手，成功率達73.3%，係目前累計J1上陣超過1,000分鐘嘅球員當中，爭高波成功次數最多

6. FC東京 - 今輪又以0：0完場，雖然連續3場作客冇波入，但亦係佢哋連續4場聯賽作客冇失波，破咗球隊史上作客連續不失球紀錄
7. 鹿島鹿角 - 雖然喺亞冠晉級8強，但係今輪聯賽主場又輸，係大岩剛上任1年以嚟首次喺聯賽主場2連敗

8. 名古屋鯨魚 - 今季目前有14個聯賽入波，但係前國腳玉田圭司今輪開齋，竟然係今季名古屋首名入波嘅日本人


廣島三箭 0：2 大阪櫻花
https://www.youtube.com/watch?v=MNjcqL2JbUs

鳥栖砂岩 0：0 FC東京
https://www.youtube.com/watch?v=m-DdABBHKkY

川崎前鋒 3：0 清水心跳
https://www.youtube.com/watch?v=AxHW_Z0qpgA

神戶勝利船 4：0 北海道札幌岡薩多
https://www.youtube.com/watch?v=4jeujFGADvE

名古屋鯨魚 2：3 柏雷素爾
https://www.youtube.com/watch?v=8gZFmmb5i-E

橫濱水手 5：2 長崎勝利丸
https://www.youtube.com/watch?v=jDzbz9ABomM

鹿島鹿角 1：2 仙台維加泰
https://www.youtube.com/watch?v=WHFh1Up0LFI

大阪飛腳 0：0 浦和紅鑽
https://www.youtube.com/watch?v=o1K_qCVfWH8

湘南比馬 1：0 磐田山葉
https://www.youtube.com/watch?v=6dAqX3FGLhw
#北海道コンサドーレ札幌 #ベガルタ仙台 #鹿島アントラーズ #浦和レッズ #柏レイソル #FC東京 #川崎フロンターレ #横浜Fマリノス #湘南ベルマーレ #清水エスパルス #ジュビロ磐田 #名古屋グランパス #ガンバ大阪 #セレッソ大阪 #ヴィッセル神戸 #サンフレッチェ広島 #サガン鳥栖 #Vファーレン長崎 #Jリーグ
圖片：JリーグOfficial site

稿件來源：J League情報站
https://www.facebook.com/pg/jleagueinfo/