之前傳過一排嘅費蘭度托利斯登陸鳥栖砂岩一事，日前終於再有新進展，多份日本報章今日不約而同報道話，費托基本上已經同鳥栖傾掂數，將以7.5億日元年薪，為期3年嘅肥約加盟，雖然同恩尼斯達喺神戶勝利船果張肥約爭好遠，但都已經超越普度斯基，將可能成為J League第二年薪最高球員。日本報章引述鳥栖會方人士話基本上落實成事，只係爭啲細節未傾好，所以今年11月10號費托嘅鳥栖對小白嘅神戶，極可能會吸引到好多眼球。
之前講過神戶因為恩尼斯達加盟而爆咗外援名額，但而家呢個問題已經解決，因為啱啱為韓國踢完世界盃嘅中堅鄭又榮，喺中超回歸神戶唔夠半年，就決定再次離隊，今次轉投卡塔爾球隊艾薩德，唔同小白做隊友都可以同沙維合作。至於目前喺J1帶到開巷嘅廣島三箭亦冇放軟手腳，盛傳好可能喺墨爾本勝利羅致科索沃前鋒比列沙，呢名前阿爾巴尼亞國腳相信睇開亞冠嘅球迷都會對佢有印象，如果廣島有埋呢名2屆A League金靴獎得主加盟，鋒線有成5個可以踢主力嘅猛將，對於城福浩嚟講都可以話係幸福煩惱。另外順帶一提，大久保嘉人喺幾日前已經落實加盟磐田山葉，將會喺磐田着22號波衫。
#トーレス #べリシャ #サガン鳥栖 #サンフレッチェ広島 #Jリーグ
圖片：Getty Images
資料來源：J League情報站
https://www.facebook.com/jleagueinfo
請按此登錄後留言。未成為會員? 立即註冊