零新聞價值的大灣區聯賽

波台黐線佬 於 12/08/2018 發表 收藏文章

大灣區,呢個term相信一眾香港人已經見慣不怪,就係一個將粵港澳融合發展嘅計劃。喺呢個大氣候之下,香港足球都朝住呢個方向發展,足總主席梁孔德早前透露香港將會參與「大亞灣」(應為大灣區)聯賽,引起軒然大波。

其實,第一屆粵港澳大灣區足球冠軍聯賽好快就會舉行,香港代表係愉園,將會同粵港澳地區嘅球隊作賽。呢個比賽仲獲得香港第一大台TVB賞識,喺新聞報道中抽部份air time出嚟介紹呢個比賽。

究竟呢個比賽有咩咁值得報道?四個字講晒,就係「政治任務」。

明眼人一睇到呢個聯賽架構,已經知道呢個所謂大灣區聯賽觀賞價值甚低,參賽球隊甚至未達中乙水平,基本上係一個業餘級嘅聯賽,從體育新聞價值嚟講係零。如果要喺新聞度報道呢啲業餘聯賽,咁點解唔去麥花臣報下豪基金城或者樂華新永利啲石地聯賽?參賽球員有前港超球員,觀賞價值仲高啦。

第二,佢報道之詳細同個篇幅之長,講到咁深入出埋賽制同球會Logo,我仲以為係講緊世界冠軍聯賽,點知原來係呢個交際性質嘅業餘聯賽,完全浪費電視台嘅air time。如果呢個比賽真係咁高水平,點解唔搵傑志東方去踢,反而要搵港甲隊愉園去踢呀?說穿了,就係呢個聯賽根本不值得重視,更唔使提廣東地區最強嘅恆大同富力了。

同樣處於大灣區嘅澳門電視台澳廣視就算都有報道有份派隊出賽,佢地都唔會忽視澳門本地體育,就連一啲本地小賽事都會報道。就算之前出戰亞洲盃外圍賽全敗,佢地都照剪精華作詳細報道,因為呢個係公共利益。

但TVB呢?背道而馳﹗

早前為咗搶收視出盡辦法令世界盃「唔存在」,再摺埋體育節目,港隊比賽又淨係識講國歌,完全忽略香港運動員嘅表現,唔單止政治唔正確,直程當公眾利益無到。與其浪費air time媚共,不如試下用多少少時間講下香港運動員嘅表現,做番一個有丁點良心嘅電視台啦。

圖片來自無綫電視新聞截圖

-James-

如果喜歡我們的文章,請即分享到︰

標籤: 大灣區聯賽  

留言

會員
我要評論
請按此登錄後留言。未成為會員? 立即註冊
  • Wai Kei Chan
    Wai Kei Chan 於 13/08/2018 評論 NO. 1

    體育只不過是政治其中一個手段

快捷鍵:←
快捷鍵:→