(幻想篇)《比比自白:「唔怕豬一般的對手 只怕神一樣的隊友!」》

英雄地 於 18/06/2014 發表 收藏文章
國家隊輸波,人人都怪我,做咩唧?

紅牌,任何人都有機會攞,我不會是第一個,也不會是最後一個,何必偏偏針對我?

外邊那些人,尤其是甚麼高登網民,譏笑我是「豬一樣的隊友」。我係呀,咁我阿媽喺豬年生我出黎,你估我想㗎?我夠想龍年出世咯,我又唔讀書,唔駛同人爭學位。

你以為有個「神一樣的隊友」,好過癮呀?你地個個偏心C朗,問心果句吖,真係真心欣賞佢好波咩?你地咪又係貪佢靚仔有型人工超高女友極索之嘛!講真,做得職業球員,踢得頂級聯賽,個個球員球技都有返咁上下架啦。

個個淨係識得留意C朗,家下踢波一個人踢晒架?一隊波,落場係有11個人嘅,焦點落晒喺佢度,我覺得好唔公平咯。我認,外表上,我的靚仔程度同佢差少少,但我身材絕對同佢有得揮,我其實仲高過佢3cm添。

是咁的,睇戲有主角,便有配角。正所謂,牡丹雖好,都要有綠葉扶持。C朗天生做主角,我咪做配角囉。我認命架,無得靠樣搵食,我平時等練波個時,都時時睇書增值自己,特別是方法演技泰斗史坦尼斯拉夫斯基的《一個演員的自白》,練好演技等上位。唔夠人靚仔,無計啦!

踢波同做戲關咩事?梗關事啦,踢波同做戲一樣,都係Show Business,本質上沒大分別,而且,呢場騷是全世界幾十億人同一時間一齊睇的,如果講分別,只會是難度更高,而且更加刺激。你唔見個個球員同教練都好好戲架咩?呢頭好似比坦克車撞倒般痛苦在地上碌來碌去,見球証無反應,咪又係在0.00001秒內極速彈返起身!仲有,球隊因禁區內犯手球/犯規的領隊,賽後永遠話睇唔到,個個都視力咁差,但到對手犯規無被罰,佢地又次次都睇到勞勞嘈嘈?呢啲咪戲囉!

你地晚晚捱夜睇世界杯,為咩先?都係想同其他人有話題啫。你地諗下喇,連巴神都正常返,伊巴又入唔到決賽周,你班友仲有咩講?「喂,尋晚巴西大熱贏左噃!」「哎,英格蘭又攻唔入噢……」「洪都拉斯真係幾弱喎!」睇到都悶啦,講呢啲!我都係幫你地帶來話題咋,唔夠瞓果啲,又可以提早熄機早些休息,我都係做好心咋!

講真,開波頭十分鐘,你都知咩事啦。C朗都未好返,除龍門外全場掂波最少,這點,你無理由看不透的,少年!見到英明神武萬夫莫敵天下無雙前無古人的葡萄牙國民英雄備受千萬美女崇拜球的球壇頭號超級偶像基斯坦奴朗拿度有難,做兄弟的點可以唔撐先?堂堂應屆世界足球先生,豈可輕易落敗於數十億人面前?

我的表演時間!

那一刻,當梅拿倒地大叫,我知道,我的表演時間到了,對着輕易上當的球証,演技特別誇張的對手,只要像平常在西甲一樣,用頭輕輕點一點湯馬士,"Bang"!我只是頭髮掂到他,連前額都未撞到佢,便達到目的了--領紅牌,讓11人打11人也一定輸的葡萄牙及C朗,為大比數落敗鋪設最佳的下台階。

終於,我成功了,在全世界最大的舞台,人人也在談論我。大家也在同情C朗,我被罵到不停打噴嚏,本來有少少唔開心,不過到球隊晚宴時,C朗走過來細細聲同我講:「謝謝你,比比!好在有你幫我頂呢一嘢。」算了,兄弟多年,又係皇馬同事,邊有得計咁多?至少,我今次羸左,他是配角,我終於做返次主角,哈哈。

其實我高大過C朗架!

我地相識於微時,果時C朗都唔靚仔又未出位。

做兄弟呢家嘢,有今生,無來世!呢鋪我幫你頂!

我地呢啲男人的浪漫,你地識咩吖!


標籤: 比比  C朗  梅拿  

留言


請按此登錄後留言。未成為會員? 立即註冊
  • ctlats 於 18/06/2014 評論 NO. 1

    我真係唔撚識啦!唔知你想講咩春天!

  • 김쇼쇼 於 18/06/2014 評論 NO. 2

    我唔覺得佢靚仔..好似賣提子乾嘅新疆佬

  • AlexTangTang 於 21/06/2014 評論 NO. 3

    合理(冇睇足球)

快捷鍵:←
快捷鍵:→