車曼大戰睇曼聯

洛遊球地 於 18/02/2020 發表 收藏文章
第二十六週既矚目大戰,一定係車路士大戰曼聯。兩隊賽前有一個小小既歇冬期,比球員作小小既休息之餘,亦都能夠趁呢個期間,可以比球隊練好多平時練唔到既野。因為英國天氣始終比較極端,由其訓練場地喺卡靈頓既曼聯,嗰邊非常大風,要好好咁練一啲戰術上既野,確實唔易。難得可以有一個小小既休息期比曼聯,曼聯當然冇嘥到啦,去咗西班牙既馬拉加做訓練。唔知係咪因為去咗一個天氣非常好既地方練習,今場曼聯球員非常醒神之餘,都有番啲戰術睇下。事不宜遲,即刻同大家淺談呢場波既小小精華。

先講講出場陣容,曼聯如預期所料,繼續用五後衛出戰,左右閘分別用威廉斯同雲比沙加。三中堅分別係梳爾,麥佳亞同復出首次上陣既拜利。中場馬迪搭費特,攻中就同上場一樣用般奴費南迪斯。前鋒兩個分別係占士搭馬斯亞。上半場開始咗一陣,車路士既簡迪已經因傷退出,換入美臣蒙特。上半場兩隊威脅唔大,雖然係咁,但主隊既壓迫,確實令曼聯後防有少少壓力。車路士喺上半場亦都有兩次黃金機會,好可惜巴舒亞伊未能夠將皮球送入網。相反,曼聯既馬斯亞上半場一直冇乜影,但係喺上半場完場前又搵到雲比沙加既傳中球,搶點成功,力壓對手頂成0:1。下半場,曼聯仍然處於一個被動狀態,54分鐘一次有威脅既攻勢,比曼聯瓦解,令到車路士有一個機會。隨即車路士既蘇馬頂入網,好可惜VAR判決下,發現車路士既艾斯比列古達喺皮球未到既情況下,已經犯咗規。所以比數仍然維持0:1。比賽時間去到65分鐘,曼聯獲得一次角球機會。般奴費南迪斯直接斬入禁區,拜利做咗一個單擋幫一幫麥佳亞擺脫對手,成功頂入,0:2。76分鐘,車路士接應傳中,基奧特插水式頂入網。雖然皮球再一次放入網,但係VAR再一次否決咗呢一球。因為基奧特喺接應傳中之前,有輕微既越位,所以再一次判入球無效。最後曼聯以0:2既比數,再一次勝出。今季喺英超雙殺車路士,亦都係曼聯歷史上第一次喺英超雙殺車路士。賽後雖然曼聯排喺第七位,但係因為曼城來季冇得打歐聯既關係,令曼聯仲有機會爭逐歐聯一席位。


啱啱只係節錄咗比賽既一啲入球,但係其中仲有幾個差啲入波既機會。首先有般奴費南迪斯既罰球,近柱地波射中柱令佢仲未能為曼聯取得第一個入波。及後,車路士亦都有一個罰球機會,但故事發展同般奴一樣,都係近柱地波,好可惜同樣係中柱。另外,呢一場波雖然曼聯最後可以保住Clean Sheets,但啱啱復出既拜利確係功不可沒。雖然但已經失咗位,令車路士既高華傑治喺亳無阻擋既情況下面對迪基亞。不過拜利冇放棄,反而即刻追番對方,最後訓到盡,省走咗個波,力保不失。比賽尾段,亦都有曼聯新加盟既恩哈路接應費特既傳送,令佢有一個半單刀既機會,好可惜比車路士既門將卡巴尼路救到。

雖然比數確實令曼聯睇落贏得幾有說服力,但確實曼聯贏得幾夠運。因為VAR既兩次判決以及車路士既把握能力不足,所以先令曼聯取得呢一場既勝仗。賽後網民亦都話曼聯唔值得贏,4424等等,既然係咁,即刻同大家分享小編對呢賽波既小小睇法。

曼聯上半場尾段雖然入咗球頭鎚,但係成個上半場幾乎只得一個有威脅既攻擊,確實未夠。再者,今場防中既馬迪亦都有好多傳失或者太慢所以比對手偷到波。雖然馬迪都出咗名係慢,但係小編認為呢個除咗佢自己有責任之餘,亦都證明戰術既不足。球員作出唔到決定或者慢,有兩大原因,第一就係球員自身既閱讀球賽能力唔夠,姐係我地打機入面Vision,而另一個原因就係供應不足。馬迪呢位球員,佢既Vision一定唔高,或者咁講,成隊曼聯根本都唔高。如果係咁,戰術就應該好好搭夠,例如安排多幾個球員喺附近做支援。但係明顯地,馬迪每次拎到波之後,都搵唔到球員比。隨即就比對手好快搶到,打番個反擊。雖然,費特既覆蓋面已經好大,但係足球比賽始終係要靠團隊,一個人既能力確實幫唔到太多。另一個角度,亦都睇到曼聯喺供應方面既不足,講緊就係反擊既時候。今場波幾次既反擊,目標幾乎一點都冇。其實好多打反擊好好既球隊,喺提供支援呢方面做得好好,因為反擊既重點就係希望製造一個「多打少」既狀況。但直至今場波,曼聯每次反擊都只係製造到一個「少打少」既狀況,再利用球員自我既能力做搭夠,咁既情況對住啲防守好穩既球隊根本冇效。睇番呢場波,有幾次反擊既機會,一係就冇人走位,一係就連人都冇。


其次,上半場馬斯亞既入波,亦都見到不足。曼聯球員入禁區既人數仍然唔夠,如果唔係車路士既兩個中堅有失誤,根本就係兩個球員夾住馬斯亞。咁既情況下,曼聯既球員又唔頂得,要落底傳中搵機會確實好難。雖然曼聯前線球員唔高大,但係曼聯亦都好應該安排多啲球員走入禁區做拉扯以及走位,情況就好似曼城同利物浦咁。

講完兩個曼聯要改善既問題,都講一講值得讚賞既地方。


曼聯喺呢次歇冬期真係改善咗小編不斷講既老問題,就係角球攻勢。以往曼聯球員都係直接衝入禁區,同對手博一舖。但係今場竟然每次直接開角球入禁區,都有配合。講緊既就係拜利幫麥佳亞做一個單擋,之後兩個擺脫對手,再衝入禁區頂入。今場曼聯竟然入到波久違既角球入波,絕對唔係因為運氣,完完全全就係因為戰術。其次,上半場曼聯都試過開短角球或者開落尾柱做二傳,可見呢次去西班牙練到既野,終於喺比賽大派用場之餘,仲得到收獲。好多球迷都話般奴角球斬得好,先可以令角波有收獲。但小編卻相反認為如果冇配合去擺脫對手,明刀明槍咁同對手頂波,就算搵修咸頓既獲特包斯去斬,結果都係一樣。


最後,小編都想同大家討論一下VAR判蘇馬唔入嗰球波。嗰球波最後判唔入既原因就因為艾斯比列古達推一推威廉斯,令威廉斯頂唔到頭鎚,判犯規。但判咗呢球波之後,都有另一個鏡頭去完完全全交代咗呢件事。原來最先係費特推一推艾斯比列古達在先,之後艾斯比列古達再推一推威廉斯。


小編用一個主觀小小既角度去講一講我自己既睇法,首先費特其實好醒,佢知道自己已經甩甩地艾斯比列古達,所以佢係追佢既同時,「Uck一Uck」艾斯比列古達,而波又未到艾斯比列古達頭頂。呢啲做法英超喺賽場入面好常見,呢啲咁少既動作球證大多數都唔吹,所以都算合理。咁點解又吹艾斯比列古達推威廉斯呢?第一,威廉斯已經企定準備起跳頂個波,而艾斯比列古達喺威廉斯未接觸波既情況下,已經推咗佢落地。第二,威廉斯因為艾斯比列古達推一推成個跌低,本來就到頭頂既波,有機會頂得走但就連跳都跳唔到,咁一定犯規啦。雖然咁樣講,好似好矛盾同有啲打橫嚟。或者咁講,個波喺未到艾斯比列古達頭上,已經比費特推咗野,呢啲喺英超只會當爭位。但個波已經到咗威廉斯個頭到,就比艾斯比列古達推一推,波都頂唔到,咁就算犯規。同埋小編認為最大原因吹艾達比列古達就係佢呢個犯規實在太明顯,所以球證先放大咗喺呢個位。

以上只係小編主觀既睇法,我相信一定有好多球迷唔認同,但我覺得呢球波犯唔犯規,真係睇球證點判。如果呢球波話係錯判,確實又未算。相反,錯判或者4424既嗰一下,一定係麥佳亞嗰波。講到尾,呢場波雖然曼聯能夠全取三分,運氣真係幫咗好多。希望嚟緊曼聯既比賽,會贏得更有說服力。

如果喜歡我們的文章,請即分享到︰

標籤: 曼聯  車路士  

留言


請按此登錄後留言。未成為會員? 立即註冊
    快捷鍵:←
    快捷鍵:→