《球迷必看》蘇斯克查對唔住一班曼聯球員以及球迷

洛遊球地 於 02/02/2020 發表 收藏文章
各位球迷,呢次係小編最後一次閙爆蘇斯克查。之後佢再點差都好,小編都唔想再講。因為話題實在太悶,同埋講嚟講去三篤屁,自己都有啲頂唔順。加上小編對蘇斯克查已經失去咗信心同耐性,但身為曼聯球迷無論點都好,小編都唔會同曼聯割蓆,蘇斯克查例外。當再一次再值得同大家分享佢既時候,小編再考慮寫佢。

首先,點解會再一次閙爆蘇斯克查,原因係因為曼聯主場對狼隊既賽事。事不宜遲,即刻同大家講下場波先。

曼聯依舊排出4231既陣式。馬斯亞打單前鋒,左右兩邊分別係馬達、占士,攻擊中場就用新簽番嚟既般奴費南迪斯。防中依舊兩位巴西球員,皮里拉搭費特,後防不變。上半場,曼聯同狼隊勢均力敵,互有攻守。雖然曼聯有攻勢,但講到入肉程段遠遠不及作客嚟到奧脫福既狼隊。狼隊以一貫嘅作風穩守等待反擊,而曼聯一樣貫徹佢地既作風,而控球為主,嘗試用一啲短傳、撞牆等等,去製造空位以及埋門機會。下半場,兩隊仍然貫徹自己既風格,雖然曼聯作出好多射門嘗試,但都過唔到葡萄牙門將柏迪斯奧既十指關。69分鐘,狼隊率先換人,尼圖入替迪奧高祖達,位換位。及後,曼聯亦喺71分鐘時間,收起當時由中路變咗挨喺左翼居多既皮里拉,由格連活特入替打前鋒既位置,左翼交比馬斯亞。接著,曼聯後防球員相繼壓上,務求施加更多壓力比狼隊後防。亦都係咁,曼聯都愈嚟愈多空位比狼隊打反擊,而後防球員都因為回防不及而逼於無奈地領黃牌。87分鐘,曼聯連續換咗兩位球員,包括馬達以及占士,換入達洛治打左翼,將馬斯亞打番前鋒,而格連活特就移去打右翼。連加特既入替就將占士換出,進攻中場由連加特擔任。本來飾演進攻中場既新人般奴費南迪斯變咗打防中,伙拍費特,做較炮以及轉換兩邊既角色。94分鐘,曼聯既最後一擊,右閘既雲比沙加落底傳中,皮球落到左翼既達洛治頭中,可惜頂唔中門,柱邊出界,兩隊互得一分。


先談談蘇斯克查今場既風格先,上下半場都好嘗試用短傳去滲入,製造機會。好可惜,幾乎每次既攻勢都只係靠馬達以及般奴費南迪斯兩位。而身為單箭頭既中鋒,馬斯亞既任務就係將皮球控好,然後同中場幾位球員做配合,簡單啲講姐係要控好個波,「得」住對手,好似柱躉式中鋒咁啦。而占士既作用就係右腳打左翼,希望可以扣去大位,作出射門,或者壓落低線出波。而值得一提既係,新球員般奴既加盟,確實令隊波都咗進攻,原因係因為佢好肯走入禁區,或者喺禁區頂等機會。好可惜,因為短傳太小配合,走位依舊唔多,令到製造到既機會都好零星,難聽啲講,冇咁上下運氣根本冇乜可能打到入去對方既心臟地帶。因為做唔到入去既關係,曼聯球員都好正確咁嘗試好多遠射,但面對葡萄牙正選門將,以及冇太多充足既空位起腳,令到曼聯進攻顯心有心無力。下半場尾段,蘇斯克查希望改變踢法,以長傳同埋落底為首,目的希望喺對方心臟地帶入面製造混亂,好可惜最後都冇成果。

用短傳滲入,講咗好多次,要球員不斷跑動,騰出空位先有效。但無論占士或者係馬斯亞都冇乜走動。另外,短傳間,好多時都要靠中鋒既身位或者護球能力去咗配合,好可惜面對狼隊兩個中堅,馬斯亞完完全全搵唔到著數。加上,上一篇文章已經講過,你想進攻由後場做上去,咁隊波有啲咩球員有能力呢?曼城為咗打呢家波,不惜重金禮聘換曬成條後防,曼聯做唔到好心就認命,打番啲適合自己既嗰家波啦。占士喺曼聯早期踢到識飛,依加踢到冇表現,就因為佢得兩招,爆落底或者扣大位,如果係咁,係咪又要作出變動呢?短傳做唔到,下半場尾段試下長傳,禁區冇個搶點叻,冇一個頂得。小編都唔知到底想靠邊一位球員入波。要打長傳、落底冇問題,都80幾分鐘啦。可唔可以搵麥佳亞入禁區頂下波呀。唔識都企喺度啦,冇。蘇斯克查仍然冇安排佢上去,咁佢唯有引球推進啦。好笨掘咁推到上去左翼位置,傳個波去左翼,作用喺邊?如果麥佳亞真係想幫手,入禁區啦。


講完戰術同球隊風格,再講換人。小編自己都好記得,講咗3篇文章關於蘇斯克查,場場都話佢換人慢。今場仲慢,見到對面狼隊換人,佢71分鐘先肯換第一個。及後,喺87分鐘先再換人。換人速度慢唔再講,佢夠膽死連後備嗰啲都冇安排熱身。小編都唔記得咗賽事去到80幾分鐘,鏡頭影住後備席,啲後備所有,係所有都坐曬喺度。達洛治、連加特、鍾泰希,個個喺齊度。喂,大哥,你唔換人都唔好比佢地坐喺到吖。跑下都好啦,雖然今日曼徹斯特有11度,但係咁樣坐喺度唔凍隻腳都緊曬啦。之後鏡頭再影後備嗰邊,已經係換連加特同達洛治,姐係話身都未熱就要落場喇。唔係要求有球熱身喎,係小小無球跑動都冇。最後呢,達洛治一落到場有個好高既波揼落嚟,攞到離行離辣。

換人既質素以及選擇就更加令人費解,71分鐘收起皮里拉換入格連活特都算合理。點解話都算合理呢,因為皮里拉好多觸球機會,雖然好多都失。但點都有啲作用,換佢或者唔換,都未算大問題。最大問題係馬斯亞,全場最差,幾乎每次背住龍門攞波都甩,都未有機會講佢回嗰腳既質素已經失咗。唔緊要,可能佢今場打中鋒真係會輸比對手中堅,咁換位打左翼啦。結果,一模一樣。87分鐘,換佢喇掛,達洛治同連加特會入替邊個,點數都應該未到全場最有威脅之一既馬達掛。點知佢就換馬達,咁蘇斯克查點排個陣呢?嘩,將馬斯亞打番中鋒,達洛治打左翼。占士個位置就比格連活特打,然後連加特打攻中。將成場波最多射門既般奴打防中。世界級,成場波兩個最有威脅既,一個打防中,一個換走。咁右腳既達洛治喺左翼要點踢呢?原來係要求佢攞左腳落底做出波。吓?達洛治平時打開右邊,佢右腳出啲波又急勁,又毒。唔緊要,咁我地再睇下右翼咩情況,格連活特原來都唔係落底,因為冇波到右翼,所以走番出嚟攞波踢。咁右邊比邊個出波呢?答案係全世界都知唔識進攻既雲比沙加。



或者同大家講一講,其實達洛治除咗打翼,都打到閘,亦都有打過閘。佢突破能力比雲比沙加好,而比賽尾段幾乎所有攻勢都屬於曼聯,姐係話狼隊已經係冇攻勢。咁點解唔比佢右打閘或者右翼呢?右翼或者要留比格連活特,比佢有機會拐去左腳大位射。但我想講,格連活特左右腳都做到呢招,佢亦都係曼聯唯一一個射術了得既雙槍將。


有球迷話,隊波唔掂,比邊個帶都唔掂啦。好,我地又睇下今場後備入面,進攻有咩人。達洛治,鍾泰希、連加特、格連活特。雖然4個入面,3個換人名額都用曬,都係換足所有進攻球員。但睇番今場比賽,其實好多變化可以做出嚟。例如,好多球員喺比賽尾段攞黃牌,梳爾、連迪洛夫、般奴等等。有兩個防守既球員攞左黃牌,可唔可以順勢收起一個呢?再講,鍾泰希可唔可以打左邊,右閘放達洛治,收起雲比沙加又得唔得呢?大家話鍾泰希唔勁,小編睇咗幾場鍾泰希有份踢既一隊比賽,佢博過起碼兩次十二碼。咁都唔值得有機會?寧願搵有黃牌既般奴打防中,都唔肯收起佢?有一次反擊,般奴差啲出咗手去犯規,如果真係咁樣兩黃一紅。蘇斯克查就會繼上場馬迪嗰次,再一次害到球隊打少個,害到球員領紅。就算大家覺得鍾泰希唔夠班都好,講到尾段要喺禁區做衝頂嗰個,都好應該係佢掛。



https://youtu.be/Z6m56OJ2ur8

記唔記得邊個馬捷達,記唔記得當年佢後備入替,最後神來之筆射入反勝既一球,贏維拉3:2。馬捷達好好波咩?點解費SIR肯試,比佢落場打?再睇下今時今日既鍾泰希,就只有坐喺後備席。唔換你都話,連熱身都唔洗你熱呀,姐係點?姐係話冇預過比你出場呀!作為球員,見到呢啲情況,點都心灰意冷啦。喺記者會就話想留人,又話曼聯將來需要你,呢啲叫需要?球迷可能會話,佢太差,連後備都唔比佢出都應該。咁係咪連身都唔洗熱,少少希望都唔比人?日日睇到Facebook Page、報導或者新聞話點解曼聯唔簽夏蘭特。你咁樣對年青球員,我係夏蘭特都唔嚟啦。更何況我要有上陣機會呢?你呢啲換人既速度,教練既質素,夏蘭特會嚟?咪玩啦!小編想老實同球迷講,就算嚟緊恩哈路嚟到,曼聯都唔會變得有幾好。正選永遠用契仔,打得幾差都唔換。華舒福好番,恩哈路會有位踢?諗下好喇!


曼聯球員,成日就比球迷閙,踢得差,冇決心。今日小編見到既,其實只係蘇斯克查冇膽識兼冇質素。費特、麥佳亞呢啲球員,做幾多野,跑幾多。冇人讚,一個失誤比人無限放大。麥佳亞明明唔係打嗰家波,係都要人攞波做短傳。緊係比人閙啦,緊係出醜啦,8000千萬買佢番嚟原來唔係用佢長處,係利用佢短處。後防球員逼於無奈攞黃牌,全因戰術。你要梳爾壓上去攻,有冇人補佢位呀?最後失位攞黃牌,咪比人話佢踢得差囉。成場封死查奧爾有冇人提及吖。咁樣既球隊,試問會有邊個球員想加盟?成日問曼聯點解唔簽呢個唔簽嗰個。你有咩吸引人?頂級教練摩連奴都話可以叫吸引之處?依加曼聯最吸引既野,都唔再吸引喇,講緊係咩?錢呀!曼聯再有錢都唔會有大球星加盟啦,咁樣教波咁樣踢。加盟前球員問經理人,呢隊波踢咩風格㗎,啱唔啱我㗎,會唔會有進步㗎?經理人答,風格未有,進步應該有,不過唔大。試問咁,點會有人踢曼聯。


蘇斯克查,你唔止係因為0比0賽和狼隊,仲笑笑口,對唔住一班熱愛曼聯既球迷。你仲對唔住一班為你踢得咁好,最後比人笑,冇人識欣賞,進步唔多既一堆球員。小編睇到場波既最後,真係有少少唔想曼聯入波,因為蘇斯克查今場連「贏」呢個字,都唔配!
標籤: 曼聯  蘇斯克查  

留言


請按此登錄後留言。未成為會員? 立即註冊
    快捷鍵:←
    快捷鍵:→