新一季Fantasy Premier League又開始

洛遊球地 於 15/08/2020 發表 收藏文章

睇咗英超咁多年,又冇乜賭波既習慣,搞到只係撐自己鍾意球隊,邊個球員踢得好,邊個球員踢得差,都好似無關痛癢咁;有時想同朋友玩下足球遊戲,又唔想投放長時間落遊戲到,都唔知搵咩遊戲好;球員踢英超就話有競爭既感覺,自己睇英超又想搵呢種競爭既感覺,又唔知係邊先搵到;逢星期一番工,想搵同事吹下波經,點知只係講得幾句,講完個比分整個話題就完咗。唔知有冇球迷有以上既經歷或者感受呢?

如果有既話,不況用幾分鐘睇下呢篇文,包你唔會後悔。講緊既就係Fantasy Premier League呢個遊戲。Fantasy Premier League同以往既英超經理人一樣,都係用遊戲中既金錢砌隊波出嚟,之後透過每一週英超真實既賽事入面,真實既球員踢成點,然後逐一比分,最後總結分數,同其他參加者一齊鬥高分。睇完呢幾句,覺得好似好難明?唔緊要,以下會有更詳細既資訊教大家點玩。

講到遊戲,大家最擔心一定係點樣下載同埋洗唔洗錢。事實上呢個遊戲係可以上網玩,唔需要下載。另外呢個遊戲亦都係免費既。如果唔想用電腦玩的話,手提電話一樣幫到你。只要下載英超官方既App,Premier League - Official App就可以玩喇。



咁到底係點玩既呢?首先每一個賬戶都會比$100蚊你洗。然後你就需要用呢100蚊買15個球員。15個球員包括11位正選,以及一個後備門將同後備、中場、正鋒各一位,總共15人。另外喺15人入面,唔可以有3個以上既球員係同一球隊。簡單啲咁講,如果曼聯想放前場三叉戟,格連活、華舒福同馬斯亞的話,就唔可以再加其他曼聯球員落去。另外,每一週既賽事開始,玩家就會有一個唔扣分既換人名額比玩家換人。若然玩家已經冇曬唔扣分既換人名額,但仍然想換人既話,系統就會喺下一個比賽週扣你分,至於扣幾多就基於你換幾多個球員。遊戲中仲有好多特別既設計,另外將球員選做隊長,咁嗰一週就會得到雙倍既分數。另外,遊戲中亦有幾個特別卡比玩家使用,好似將隊長分數變為三倍或者係嗰一週換人係免費等等。

咁玩家會同邊啲玩家玩呢?其實就真同全球玩緊既,因為每一週既賽事,如果你係攞到整個遊戲既頭20名,都可以得到英超既禮物。如果想同朋友玩又得唔得?當然可以啦,玩家可以自己組織一個聯賽邀請朋友同你一齊玩。如果每個星期都踢Sunday League既,相信呢個遊戲一定好多隊友一齊同你玩,不過記得每一週都要同隊友計分,最低既起碼請飲野,咁先好玩。如果身邊冇朋友的話,又可以點呢?遊戲中除咗有Private League之外,當然仲有Public League啦。只要你加入咗,就可以同對手鬥過你死我活。另外身處於英國既小編想比多個Tips喺英國既朋友。好多英國既酒吧都有開League比大家玩,如果冇朋友同你玩唔緊要,落去啲Pub到睇一場波,望下啲牆有冇釘住塊板寫住有得玩。因為喺英國,呢隻Game都幾紅㗎。


之後就係獎勵嗰方面喇,無論新手定係玩咗幾年既玩家都可能唔知呢一點。原來呢隻Game唔止有獎勵比整季最高分既玩家,就連每一個月最高分或者每個星期最高分都有獎勵。獎勵方面,小編覺得都唔差㗎。以下係2019/2020球季既獎勵:

整季第一名
來季聯賽兩場比賽VIP招待
由英國旅遊局提供的為期一周的熱門旅遊景點體驗
包括旅行七晚同住宿
TAG Heuer手錶
FIFA 20
Nike外套
FPL禮包

整季第二名
來季聯賽一場比賽VIP招待
包括旅行兩晚同住宿
FIFA 20
平板電腦
藍牙喇叭
Nike外套
FPL禮包

整季第三名
FIFA 20
平板電腦
藍牙喇叭
Nike外套
FPL禮包

FPL 盃賽冠軍
來季聯賽一場比賽VIP招待
包括旅行兩晚同住宿
FIFA 20
平板電腦
藍牙喇叭
Nike外套
FPL禮包

每月第一名玩家
平板電腦
藍牙喇叭
Nike外套
FIFA 20
Nike比賽波

每月頭十名玩家
FPL禮包

每週第一名玩家
FIFA 20
Nike 比賽波
FPL袋
FPL杯

每週頭二十名玩家
FPL禮包

每個星期只需要騰幾分鐘時間,就有一次中六合彩既機會,加上同朋友、隊友、同事有更多既共同話題,你唔係唔下載呀嘛?來季希望大家有運中番次獎啦!另外歡迎大家讚好我Facebook專頁,遲啲會開番個Private League,同大家一齊玩,所以記得讚好留意住。
標籤: 英超  足球經理人  

留言


請按此登錄後留言。未成為會員? 立即註冊
    快捷鍵:←
    快捷鍵:→