施治之前,五位由車路士轉投阿仙奴既球員

隨心寫足球 於 31/07/2015 發表 收藏文章
上季施治於車路士鬱鬱不得志,因為長達十年既正選位置由後起之秀古圖斯搶走。今季,阿仙奴睇準時機於同市宿敵引入33歲既施治,令隊中門將實力上升左唔少。施治係史上第六位由車路士轉會阿仙奴既球員,我地不妨睇一睇頭五位:

(施治)

1. 比爾迪臣(Bill Dickson)


第一單由車路士轉到阿仙奴既球員交易原來發生於多過半個世紀以前:1947年時比爾迪臣由諾士郡轉投車路士,首幾季比爾迪臣受盡傷患煎熬,但由第四季開始,比爾迪臣走出傷患陰影,成為車路士後防一大支柱。其後於1953年,比爾迪臣以一萬五千鎊「入廠當兵」,呢位北愛爾蘭國腳起初表現唔錯,但其後又再次由到傷患困擾,效力三季只為阿仙奴上陣過31場後就離隊他投。

2. 佐治格拉咸

出身於阿士東維拉既佐治格拉咸,為車路士上陣過七十二場英超,射入三十五球,優秀既表現吸引到阿仙奴既目光,喺1966年佐治格拉咸同當時車路士領隊杜卓迪不和下,阿仙奴以75000鎊另加湯美保榮(Tommy Baldwin)成功引進佐治格拉咸。喺阿仙奴既六季,佐治格拉咸得到佢生涯最光輝既時段,包括贏得聯賽及足總盃雙冠軍。退役之後,佢曾經做過阿仙奴既領隊,贏過兩屆英超,兩個聯賽盃冠軍等。

3. 加拿斯
佐治格拉咸加盟阿仙奴四十年後,出現左第三位由車仔轉投槍手既球員。加拿斯當年成為車路士購買艾殊利高爾既籌碼,被送至阿仙奴。加拿斯同車路士於離隊指互相指責,車路士指加拿斯曾經要脅若然球會唔放人就會射烏龍波,而加拿斯指車路士指控完全不實。加拿斯轉投阿仙奴後穿上十號球衣,並一度成為球隊隊長,四季以黎於英超上陣超過一百場。

4.拉辛拿迪亞拉

拉辛拿迪亞拉於車路士被視為馬基列尼既後備,所以一直上陣機會都唔多,但因為有馬基列尼既教導,迪亞拉既進步神速,喺預備組既比賽中往往都有好表現。儘管機會開始增多,但兩年黎佢只為車路士踢過十三場英超,其後就於07年加盟阿仙奴,並著上龍格堡留低既8號波衫。可惜,以為可以覓得正選位置既迪亞拉,都係要排喺法明尼後面,效力槍手一年只踢過七場英超,其後就轉投樸茨茅夫。

5. 班拿約


班拿約經常被球迷戲稱為白粉佬,但佢既球技絕對唔差,佢喺韋斯咸同利物浦時既表現得到車路士既青睞,並2010年加盟史丹福橋。由於阿基里腱傷患,以及馬達既在陣,班拿約喺車路士冇太多上陣既機會,最後佢選擇以外借轉投阿仙奴。短暫效力阿仙奴既一季,班拿約於廿五場賽事中射入六球,並於聯賽盃對曼城既比賽中擔任隊長,該場阿仙奴以阿迪達既遠射小勝一比零。現時班拿約返回祖國以色列,效力海法馬卡比。

原文,經編輯

各位不妨讚好隨心寫足球既FB專頁,專頁除左會發佈文章之外,亦會定期為大家送上球壇趣聞,讓大家緊貼足壇!多謝支持:https://www.facebook.com/footballvoicehk?fref=ts

留言


請按此登錄後留言。未成為會員? 立即註冊
  • Tsoi Kwok Tung 於 31/07/2015 評論 NO. 1

    致筆者:係格拉咸仲係球員既年代未有英超,果時英格蘭最高級別聯賽係英甲

快捷鍵:←
快捷鍵:→