「狐狸鐵硬防守最大功臣之一 Caglar Soyuncu」

足球一家人 於 16/11/2019 發表 收藏文章
李斯特城今夏放走主力中堅Maguire,英格蘭人以最貴中堅身份加盟曼聯。Maguire嘅離開導致好多人認為狐狸必須搵到佢嘅代替者,否則李斯特城防守端會有個大洞。其實夏窗時李斯特城曾經考慮引入般尼茅夫嘅荷蘭人Nathan Ake同般尼嘅Tarkowski,無奈兩者嘅球會吊高來賣。最後李斯特城選擇依賴球隊中嘅球員,而估唔到最佳中堅搭檔竟然就係隊中嘅Jonny Evans同土耳其人Caglar Soyuncu。呢對北愛爾蘭-土耳其搭檔立馬擦出火花,今季表現非常出色。目前李斯特城係英超中被攻入最少球嘅球隊,呢對中堅嘅表現甚至引起了曼城嘅注意。
Jonny Evans可以話係英超老球員之一啦,相信冇人唔識佢。但是Caglar Soyuncu又來自什麼背景咧?Soyuncu今年23歲,出自於土耳其球隊Altinordu F.K青訓。2015/16賽季時,當時年僅20歲嘅佢已經同多家歐洲大球會被連繫一起,其中就有西甲球隊西維爾(Sevilla)。最後佢喺16/17賽季選擇加盟德甲球隊費雷堡(SC Freiburg),佢覺得加盟德甲有利於自己嘅發展。
喺德甲嘅佢依然表現出色,16/17賽季中旬佢再次同多家球會被連繫一起,而今次就有意甲球隊羅馬,西甲嘅維拉利爾同英超球隊曼城。雖然如此,Soyuncu抵住誘惑並留喺費雷堡多一季。由此可見,年紀輕輕嘅佢已經懂得如何拿捏自己職業生涯嘅發展。 2018年,德甲官網甚至拎Soyuncu同德國名將Mats Hummels比較,話佢哋嘅風格相似。土耳其人最出色嘅莫過於佢能看透比賽嘅能力,呢點就同Hummels非常相似。
2018年夏窗,李斯特城以19mil英鎊簽下Soyuncu,土耳其人正式登陸英超!當時並無好多人認識佢,但佢靠住自己嘅努力同一次又一次嘅出色表現征服咗所有人。今季對陣水晶宮Soyuncu更打入首個英超入球,職業生涯再創高峰。Soyuncu雖然只得23歲,但是佢喺球場上的表現十分成熟。佢依家絕對係李斯特城後防的核心人物之一。
曼城夏窗未能成功引入前隊長Kompany嘅代替者,本來相中的Maguire最後加盟死敵曼聯。咁唔好彩主力中堅Laporte又重傷加上Otamendi頻頻失誤,導致哥帥逼不得已將Fernandinho當中堅用。近日就有傳曼城有意喺一月冬窗引入Soyuncu或者Evans其中一人。其實理性嚟講曼城引入Soyuncu嘅可能性比Evans高,畢竟Evans已經31歲。Soyuncu確實非常適合哥迪奧拿嘅足球理念,因為Soyuncu左右腳通用,佢冇所謂嘅weaker foot!唔通佢就係哥帥夢幻中的中堅?!
小編認為Soyuncu短時間內唔應該加盟曼城。佢依家喺李斯特城係絕對嘅主力,若加盟曼城好可能只會當替補。狐狸亦唔需要擔心Soyuncu想加盟曼城,因為李斯特城唔缺錢加上李斯特城好有機會獲得下季歐聯嘅一席之位。希望Soyuncu會留喺李斯特城帶領狐狸再次征戰歐聯,亦為自己嘅職業生涯再創新高峰!



本專欄是由兩名來自馬來西亞的學生開設,如果喜歡歡迎追蹤專欄或FB專頁 足球一家人
https://www.facebook.com/FootballFamily627/

留言


請按此登錄後留言。未成為會員? 立即註冊
    快捷鍵:←
    快捷鍵:→