近況如何？加比爾巴布沙勇奪巴甲金靴，一月重返國米定去向 精選

加比爾巴布沙 (Gabriel Barbosa) 曾經被譽為巴西鋒線超新星，2016年夏天以2950萬歐元轉會費由巴甲山度士加盟國際米蘭，但初初登陸意甲似乎有水土不服跡象，一季後就開始外借生涯，先後被借到賓菲加及母會山度士。返到自己熟悉嘅環境，加比爾巴布沙表現如何？


同期巴西年輕前鋒中，現年21歲嘅加比爾捷西斯 (Gabriel Jesus) 比加比爾巴布沙年輕一歲，喺2017年初以2880萬歐元轉會費由彭美拉斯加盟曼城，年齡接近、身價接近，兩位加比爾難免成為外界比較對象。加比爾捷西斯加盟曼城之初除傷患困擾外，基本上可算迅速融入，表現理想，首季聯賽上陣10場已貢獻7入球4助攻，第二季聯賽上陣29場貢獻13入球4助攻。今時今日或者難以想像，當初兩人登陸歐洲球壇之時，加比爾巴布沙嘅聲勢及背負嘅期望，比起「耶穌仔」更大，當時加比爾巴布沙本來已經擁有 "Gabigol" 外號 (即入球能力高) ，腳法出眾嘅佢更被評為「新尼馬」。


誰料兩個加比爾，相距半年先後登陸歐洲，加比爾捷西斯迅速喺節奏快速激烈嘅英超，而且喺豪門曼城中站穩陣腳，更入選2018世界盃巴西國家隊大軍，相反 "Gabigol" 逐漸消失於歐洲主流聯賽球迷視線之中。佢加盟國米第一季各項賽事只錄得10次上陣、射入1球，之後一季被外借到賓菲加，各項賽事只上陣過5場、射入1球，半季就被「退貨」，改借回母會山度士，由2018年1月效力至今。


喺2018巴甲球季中， "Gabigol" 重新成為球隊主力，聯賽上陣35場，射入18球。雖然山度士只能以中游第10位完成聯賽，與冠軍彭美拉斯相距30分之遠，但加比爾巴布沙就以5球優勢成為巴甲金靴得主，又當選年度最佳前鋒、最佳陣容。




加比爾巴布沙於 Instagram 上答謝球迷及隊友支持。佢嘅外借合約將會於12月31日完結，加比爾巴布沙受訪時表示於1月重返國米再定去向，暫時未可以肯定下一站，但首要條件係需要有充足上陣時間。雖然虛耗咗唔少光陰，但其實加比爾巴布沙亦只係22歲，如果佢可以搵到一間比賽強度同上陣時間合適嘅球會，循序漸進，仍然可以有唔錯嘅發展。根據轉會傳聞，國米願意將佢放售，而愛華頓、韋斯咸及水晶宮三間英超球會亦盛傳有興趣將佢收歸旗下。愛華頓現時有巴西翼鋒李察利臣表現出色，同時禾確特飽受批評，對加比爾巴布沙嚟講應該係一個機會，但至於佢可唔可以適應英超，就係一個大問號。

加比爾巴布沙今季「球王片」：
https://www.youtube.com/watch?v=BHCasfdulNo
Source: Goal、Transfermarkt