95分鐘被追和涉侵犯門將爭議,肥賓怒叱:「英超球證唔識球例!」

睇足365 於 12/02/2019 發表 收藏文章
周一英超上演一場獨腳戲,由狼隊主場迎戰紐卡素。升班馬狼隊今季表現出色,位處英超中上游位置,相反紐卡素就喺中下游位置,需要避免跌入護級區域。作客嘅紐卡素今仗場面上稍不及狼隊,但仍然憑希頓 (Isaac Hayden) 嘅入波先開紀錄,眼看可以將優勢帶到完場之時,喺下半場補時階段第5分鐘,狼隊一次高空攻勢進襲得手,追平1-1完場,但紐卡素一方就認為入球有犯規之嫌。


英超第26輪賽事,狼隊對紐卡素。狼隊上半場徒有攻勢但臨門一腳把握力欠奉,埋下失分伏線;下半場,前阿仙奴青訓學徒希頓接應舒亞 (Fabian Schär) 傳送,轉身壓入禁區勁射近柱破網,打破僵局,兼射入個人自2017年10月以嚟首個入球。

下半場戰至90分鐘仍然維持紐卡素領先1-0嘅比數, 球證喺4分鐘補時之上「補上補」。94分30秒,艾達馬查奧爾 (Adama Traoré) 右路傳中,皮球高而無力,眼看完全構唔成威脅,可以被門將沒收,豈料紐卡素門將杜巴夫卡 (Martin Dúbravka) 跳起沒收之際,不提防身後有狼隊嘅韋利保利 (Willy Boly) ,被後者搶先頂入,追成1-1。

《Sky Sports》評述認為責任完全喺紐卡素門將杜巴夫卡身上,佢有足夠時間判斷皮球落點,但移動略慢,起腳唔夠果斷,亦冇觀察四周環境。


紐卡素主帥賓尼迪斯自然有唔同睇法,「肥賓」喺賽後不諱言:「喺英格蘭,佢哋(球證)唔明白球例。我可以講更多,不過改變唔到任何嘢。我唔鍾意最後嗰種衝撞,你需要保護門將。我哋喺度已經好多年,但仍然好難理解點解會咁樣。」雖然為球員抱不平,但「肥賓」亦同意門將杜巴夫卡需要變得更加強壯。



全場精華

Source: Sky SportsDaily Mail

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • 4466hk
    4466hk 於 12/02/2019 評論 NO. 1

    呢次我撐肥賓,龍門可以做得更好係事實,但侵犯龍門亦係明顯嘅事實,係小禁區啊!龍門係秤先九成架!噉都唔係 foul ?球證你去踢啦!我唔係紐迷,亦冇賭波,但真係睇唔過眼囉!

快捷鍵:←
快捷鍵:→