鬼馬甸恩執法「雙藍會」兩度「發作」:吹十二碼擺甫士、完場收埋比賽波整估阿古路

睇足365 於 11/02/2019 發表 收藏文章
英超周日上演「雙藍會」大戰,曼城對車路士,賽事由一向充滿爭議嘅球證甸恩 (Mike Dean) 執法,曼城最終以6-0大勝車路士,更喺上半場25分鐘已領先4-0,戰況令人驚訝。比賽形勢一面倒,球證甸恩喺執法方面並冇機會「表演」,冇任何爭議判決,值得一讚,但一向不甘低調嘅佢選擇以另類嘅方式「搶fo」。


喺比賽54分鐘,艾斯派古達喺禁區內犯規,球證甸恩判罰12碼,判決正確,有趣在於甸恩嘅反應,佢猶如謝霆鋒上身,突然大擺甫士,指向12碼點兼定格2至3秒,唔講仲以為頭頂有spotlight,夠晒chok。



比賽結束後,大演帽子戲法嘅阿古路按傳統問球證拎走比賽波留念,百厭嘅甸恩同球員握手時已經一直將個波收喺身後,到離遠見到阿古路過嚟嘅時候,更加將個波收喺件衫入面。不過喺英超征戰多年嘅阿古路早已熟悉甸恩性格,行到埋嚟嘅時候已經望住甸恩大笑,甸恩亦馬上喺身後將個波拎返出嚟,並且恭喜阿古路。

球證誤判時有發生,唯獨甸恩成為近年所有英超球迷熟知嘅名字,因為即使撇開判決質素不論,佢仲有一個特點,就係會頻繁地喺比賽中展露自己情緒同表情動作多多,例如佢曾經因為自己俾完得益之後,攻方處理欠佳斷纜,而展示出可惜嘅反應;又例如佢曾經疑似慶祝熱刺入球,有人認為佢只係慶祝自己俾得益俾得靚,但呢啲情感嘅流露自然會被視為唔專業嘅表現。點都好,要多謝甸恩生動嘅表現一直為球賽增添樂趣。


甸恩歷來精彩表演

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→