雲加再評愛將:奧燒續約後入咗comfort zone

睇足365 於 20/02/2019 發表 收藏文章
日前,雲加曾經對舊球會阿仙奴放走艾朗藍斯發表評論,認為藍斯自由身離隊轉投祖雲達斯,對於阿仙奴嚟講係一個損失,相反對祖雲達斯嚟講就係好收購,更大讚藍斯嘅無球跑動能力出色,屬當今中場球員中罕有嘅「高質」。適逢近日出席頒獎禮及擔任歐聯直播嘉賓,雲加近日喺唔同媒體上不斷有公開評論,其中就包括對另一位前愛將奧斯爾嘅近況評價。


阿仙奴中場奧斯爾所受批評比起藍斯更甚,球迷對藍斯評價兩極,至少仲睇得出佢喺球場上嘅努力,但奧斯爾嘅比賽態度同積極程度一直都係球迷爭奪焦點,好多人認為佢睇落好hea、大戰例牌失蹤,亦有人提出奧斯爾嘅比賽跑動距離係全隊頭幾位,佐證佢並非懶惰。


點都好,奧斯爾偏軟嘅球風似乎唔係阿仙奴主帥艾馬利嗰杯茶,近來奧斯爾不管因為戰術因素或報稱受傷,已經多次被排除於正選名單,甚至比賽大名單之外,冬季轉會窗前更傳出阿仙奴有意將佢放售。

雲加最近被問及對奧斯爾嘅處境有咩睇法時,回應指認為奧斯爾自從續下長約之後未能保持表現:

「我一向認為球員嘅合約長度,同球隊揀選出場陣容無關,但有時候都會有特別情況。我哋好多時會以為,同一個好球員簽一份5年合約,就代表我哋擁有一位好球員5年,但實際情況唔一定係咁,佢哋唔一定保持努力訓練、踢出身價,因為佢哋有可能進入咗comfort zone (舒適圈) 。」

雲加認為奧斯爾喺續約後,可能唔喺最佳狀態,但事實上,奧斯爾同阿仙奴高薪續約至2021年夏天,正係雲加離開前發生嘅事,佢就咁樣解釋:

「佢(奧斯爾)有合約在身,但問題在於,如果你想喺市場上買到一個好似佢咁嘅球員,就要使1億英鎊。而要保持一個球員嘅價值,就算喺奧斯爾之外嚟講,更多係同足球嘅運作有關。

要買一個好高質素嘅球員,你要俾1億鎊,所以你寧願同手上呢位球員續約,唔使額外支出,定係拎錢出去買個新球員呢?」

雲加講話片段:

Source: Guardian

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→