迪馬利亞神來之筆，超窄角度腳面笠射令人驚嘆

講起巴黎聖日耳門球星迪馬利亞 (Ángel Di María) ，一定記得佢近年喺歐聯曾經對返舊東家曼聯同皇家馬德里，同樣踢得特別醒神。法甲一隊獨大，吸引力對外地球迷嚟講比較低，迪馬利亞加盟PSG後，難免比較少得到香港球迷注目，去到最近歐聯大勝皇馬一仗，「天使」梅開二度，不少球迷表示原來迪馬利亞仲咁勁！但其實以佢級數，喺 "easy mode" 嘅法甲，又點會唔勁？最近呢場法甲比賽正好再一次為大家提供欣賞佢表現嘅機會。


香港時間10月19日02:45，巴黎聖日耳門作客尼斯。PSG開波無耐已經一輪猛攻，但被尼斯「血肉長城」阻擋。去到14分鐘，尼斯壓上出現漏洞，PSG喺後場一腳傳到中圈附近，伊卡迪墮後迎波，第一時間劏出直線，迪馬利亞喺中場線已經單刀，輕鬆推入禁區，PSG領先1-0。

https://i.imgur.com/TYz91x6.gif
精彩一刻出現喺第21分鐘，PSG右閘梅尼亞喺右路邊線挑傳過頭波，個波彈彈下，「天使」眼見尼斯門將企位較出，雖然角度好窄，而且自己慣用左腳，但照樣用左腳腳外擋凌空笠射，收死門將賓尼迪斯入網。

https://i.imgur.com/yBQIXJG.gif
https://i.imgur.com/GyglorR.gif
之後，PSG後防混亂，一度被尼斯追成1-2，但尼斯喺74及77分鐘接連有球員被逐，只能以9人應戰。結果，PSG完場前由麥巴比及伊卡迪再下一城，以4-1大勝。

https://www.youtube.com/watch?v=F-OlGe49j00
迪馬利亞喺皇馬時期，上陣190場，錄得36入球、85助攻；而嚟到PSG後亦已上陣193場，錄得76入球、71助攻，其實佢除咗初出道喺阿根廷聯賽之外，一直都係助攻多於入波，只有喺PSG嘅入球數字多於助攻。