【轉會消息】富咸來季有睇頭:正式簽入米祖域,求購史雲斯中堅莫臣已獲接納

睇足365 於 31/07/2018 發表 收藏文章
今個英超轉會窗將會於8月9日關閉,唔少豪門已經動作多多,但其實升班馬方面亦都唔可以睇少,除咗狼隊之外,富咸亦都準備大展拳腳。


升班馬富咸官方宣佈,佢哋正式由紐卡素簽入塞爾維亞前鋒阿歷山大米祖域 (Aleksandar Mitrovic) ,雙方簽約五年。據《Sky Sports》報導,轉會費初步達到2,200萬鎊,加上與表現掛勾嘅額外費用後可以達到2,700萬鎊。米祖域加盟富咸,適應球隊踢法方面完全需要擔心,因為佢其實喺17/18球季下半段就以租借形式來投,英冠17場射入12球,效率極高,係富咸升班功臣之一。


不過,米祖域嘅英超經歷唔算合格,佢喺2015/16球季加盟紐卡素,被寄予厚望,34場貢獻9入球4助攻,數字上唔算出色,更有兩次領紅牌被逐,17/18球季跟隨球隊升班重返英超,就得唔到足夠機會,聯賽只上陣6場,結果喺下半季被外借。另外,米祖域生涯早年有紀律問題,作為中鋒,年僅23歲已經累積46面黃牌、1次兩黃一紅,以及5次直接領紅,可幸佢近年似乎成熟不少,16/17球季開始就冇再拎到紅牌,亦只累積6面黃牌。


另一方面,富咸最近出價求購史雲斯中堅莫臣 (Alfie Mawson) ,據《Sky Sports》報導,史雲斯已經接納富咸提出嘅約2,000萬鎊報價,其中1,500萬鎊為初始轉會費,球員將於日內進行體檢及商討個人條件。莫臣現年24歲,史雲斯於17/18球季表現雖然不佳,但更突顯莫臣於防線上嘅作用,令佢得以於3月入選英格蘭國家隊踢世界盃前嘅友賽。由於史雲斯來季降至英冠,正值上位關頭嘅莫臣勢必離隊,所以今次富咸極大機會得到莫臣來投。


除咗米祖域同莫臣之外,富咸今個轉會窗已經成功由多蒙特借用舒爾尼,亦以2,700萬鎊由尼斯簽下利特迪瓦中場占舒利 (Jean Seri)及價值360萬鎊嘅中堅拿馬查特 (Maxime Le Marchand) ,比錫達斯門將法比斯奧 (Fabri,Fabricio Ramirez)。加上隊中有新一代英格蘭天才賴恩施斯隆 (Ryan Sessegnon) ,來季一定要密切留意富咸嘅表現。


Source: Sky SportsTransfermarkt

留言


請按此登錄後留言。未成為會員? 立即註冊
    快捷鍵:←
    快捷鍵:→