費蘭甸奴世界盃陰影未散,為家人拒再代表巴西

睇足365 於 25/12/2018 發表 收藏文章
為國家隊上陣對足球員嚟講係無上光榮,特別係喺巴西呢種傳統足球強國,不過喺光榮同責任以外,如果球員得到唔應用尊重,為國上陣可能變成一種負擔。曼城中場費蘭甸奴自世界盃後,未有重返巴西國家隊,正係基於上述原因。


2018俄羅斯世界盃,巴西喺八強面對比利時,由於巴西陣中首選防守中場、效力皇家馬德里嘅卡斯米路停賽,費蘭甸奴成為代替佢正選上陣嘅防守中場。有別於喺新科英超冠軍曼城嘅穩定演出,費蘭甸奴喺呢場比賽中表現堪稱災難,喺一次防守角球時擺烏龍只係不幸,但整場比賽完全冇做到中場屏障及控制節奏嘅工作。最終,巴西以1-2八強止步留下遺憾。


費蘭甸奴作為曼城陣中不可或缺嘅一塊拼圖,好難話佢本身能力極差,只係佢喺呢場波入面明顯有「生不逢時」嘅感覺,佢並冇卡斯米路嘅速率,但喺巴西當時戰術體系之下未有因應呢個位置調整,結果費蘭甸奴嘅弱點表露無遺,經常要單人匹馬面對比利時球員嘅正面突破,頻頻出醜,並非完全係佢嘅責任。

不過,部分激進球迷唔會進行戰術分析,佢哋認定費蘭甸奴係巴西出局罪人,不但稱佢為「猴子」,更騷擾佢嘅家人。有報道指,費蘭甸奴太太收到唔少侮辱性短訊,內容令人不安。


巴西主帥迪堤近日接受訪問,表示自己十分渴望費蘭甸奴可以重返國家隊,但球員回覆指,已經答應家人唔再為巴西國家隊上陣:「喺世界盃過後,選球員時我第一個想打電詔通知嘅係費蘭甸奴,佢係第一位。不過發生喺佢家人身上嘅事太殘酷,佢已經向家人承諾唔會再返嚟。我親自去搵佢傾過,因為巴西隊對於擁有咁樣一位有尊嚴而專業嘅球員感到十分驕傲。我當然唔會蠢到要求一位唔情願嘅球員入伍,我希望佢改變主意,我會支持佢。」

當然,費蘭甸奴已經年屆33歲,為國上陣49次,即使以競技原因退出國家隊亦唔會令人驚訝。同時,巴西其實亦唔係視佢為核心球員,特別係近期選入拿玻里中場阿蘭 (或阿倫) 比起費蘭甸奴或者係更合適人選,但一位球員因為場外因素而選擇退隊,係令人惋惜嘅。

Source: ASTheSunFIFATV

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→