【見過鬼唔怕黑】沙治奧拉莫斯疑蓄意領黃「洗底」,面臨UEFA調查可被判加監

睇足365 於 15/02/2019 發表 收藏文章
周中歐聯16強首回合賽事,阿積士主場對皇家馬德里,皇馬順利取得兩個作客入球,以2-1取勝而回,佔有晉級先機,比賽尾段,皇馬隊長沙治奧拉莫斯領到一面黃牌,將會喺次回合賽事停賽,有傳媒報導佢喺賽後一度承認自己蓄意領黃,確保喺8強賽事開始以「清白之身」出賽。此舉令歐洲足協UEFA對佢展開調查,有可能令佢被罰額外停賽。


阿積士主場對皇家馬德里嘅比賽第89分鐘,皇馬已經作客領先2-1,出線形勢佔優,隊長沙治奧拉莫斯呢個時候就喺中圈位置對阿積士前鋒多爾貝治犯規,個人喺今屆賽事累積第3面黃牌,將會喺次回合賽事停賽,但若果皇馬順利晉級到8強賽事,佢將會以「清白之身」出賽;若沙治奧拉莫斯今場未有領黃,而喺次回合賽事中領黃的話,佢就要喺8強首回合停賽。

評述員基昂喺直播節目中就認為,拉莫斯領黃「意圖明顯」。可能當時情況太過「巧合」,賽後有傳媒問拉莫斯係唔係蓄意「洗底」,拉莫斯坦言:「喺呢個比數之下,如果我話唔係有心,咁就係講大話。咁樣唔係低估對手,或者以為16強已經完咗,不過喺足球嚟講,有啲艱難嘅決定要做,而決定咗要咁做。」

根據《BBC》報導,UEFA聲明指將會就拉莫斯嘅言論作出調查;按規定,球員蓄意領牌,可以被罰停賽兩場。其實,拉莫斯對呢個情況絕對唔陌生,佢同前皇馬中場沙比阿朗素兩人同時喺2010年對阿積士,呢場大局以定嘅比賽之中被裁定蓄意領黃,結果被加罰停賽。另外,皇馬後衛卡華積上季歐聯對尼科西亞時,亦被裁定蓄意領黃,停賽兩場。



不過,拉莫斯喺相關報導刊出後,於Twitter上澄清指自己並非蓄意領黃,但就有球迷回應貼上相關片段指拉莫斯前言不對後語。馬卡報《Marca》報導亦認為,喺87分鐘阿辛斯奧取得入球之後,拉莫斯向後備席廂人員請示,更疑似做出球證出示黃牌嘅手勢,然後就喺89分鐘領到黃牌;阿斯報《AS》亦有相信係拉莫斯承認刻意犯規嘅錄音,但畢竟筆者唔識聽西班牙文,所以呢點係無從判斷。


阿斯報錄音

Source: BBCESPNASMarca

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→