被傷患摧殘的世界級中場迪亞比遺憾退役 普巴半年前曾稱:「我跟佢學嘢」

睇足365 於 26/02/2019 發表 收藏文章
作為球壇一位罕見兼已經被遺忘嘅超級「傷追人」,前阿仙奴中場迪亞比 (Abou Diaby) 以32歲之齡宣布掛靴,終結佢多災多難嘅球員生涯。希望球壇唔會再有人繼承佢不幸嘅命運。


冇睇過迪亞比健健康康踢波嘅人,只會知道佢傷多過踢嘅事跡,亦恥笑佢為「文員」,以為佢球技不甚了了。事實上,迪亞比身高腳長,腳下功夫亦佳,初出道時被封為「新韋拉」,但其實佢嘅踢法更加進取,雲加就表示覺得迪亞比侵略性更強、擅長盤球突破及走位入楔。如果要喺今日搵一個球員類比,佢大約類似於今日嘅普巴。球迷睇到呢度,唔好笑住,將現今身價接近一億嘅普巴同迪亞比拎嚟比較,睇落好好笑,其實迪亞比不但身型踢法同普巴有相似之處,普巴本人更提出自己曾經喺迪亞比身上學習。


2018年5月,普巴接受訪問時被問到覺得世上有邊啲中場球員比自己好,佢不但提出迪亞比嘅名字,仲補充指自己曾經向佢學習:「恩尼斯達、摩迪、卻奧斯、迪布尼、大衛施華,仲有迪亞比。佢喺阿仙奴嘅時候好出色,大家已經忘記咗佢,但我喺佢身上學到好多嘢。」


迪亞比阿仙奴生涯總共上陣過124場,貢獻14球11助攻,以佢效力阿仙奴九年時間嚟睇,呢個上陣時間係少得出奇。厄運源於2006年5月,阿仙奴作客新特蘭嘅比賽,迪亞比被甸恩史密夫鏟中足踝受傷,令佢自此開始「玻璃人」生涯。另外,佢亦因為經常盤球突破而被粗野侵犯。


根據《TalkSPORT》於2015年製作嘅圖片,迪亞比自從2006年右腳踝受傷開始,「傷開有條路」,傷患遍佈全身。


雖然如此,時任阿仙奴主帥雲加繼續對佢不離不棄,不但多次續約,只要迪亞比身體情況許可,都會馬上將佢派上場,更入選法國國家隊,已經足以證明佢嘅實力。迪亞比喺阿仙奴最後嘅歲月上陣時間寥寥可數,但仍有一場比賽令人為之驚嘆:2012-13球季之初,健康嘅迪亞比喺球季頭三場比賽全部正選上陣,更加喺對利物浦一仗獲選為《Sky Sports》全場最佳球員,似乎應驗咗雲加金句,傷兵復出有如強援加盟。可惜佢喺對車路士時再次傷出,其後亦曾經喺對曼城時獲委以重任,但全季仍斷斷續續缺陣。


2015年7月,迪亞比自由身轉投馬賽,但繼續受傷患困擾,兩季內只於各項賽事上陣4次,最終雙方於2017年協議解約。

迪亞比最終喺法國《RMC Sport》電視節目上,透露自己已經退役:「過去好幾年,復出對我嚟講都係難事。我身體出現好多問題,有時候我都會問自己係唔係應該退落嚟。我決定停落嚟,純粹係因為身體已經跟唔上,呢個係艱難嘅決定,因為我人生大部分時間都係同足球有關。

舊一頁嘅終結,就會有新一頁嘅展開,我已經考慮得清楚。當我離開馬賽之後,我俾自己一年時間,結果情況比我想象中複雜,去到影響我日常生活嘅地步。」

迪亞比2012年對利物浦精彩表現

Source: Sky Sportsfourfourtwo

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→