【羅生門】阿爸「被委任」做加蓬主帥 奧巴美揚怒斥足協業餘:「我阿爸冇應承」

睇足365 於 22/09/2018 發表 收藏文章

加蓬足協早前官方宣佈,西班牙籍主帥甘馬曹 (Jose Antonio Camacho) 離任後,委任Pierre Francois Aubameyang,即阿仙奴前鋒奧巴美揚 (Pierre-Emerick Aubameyang) 父親,以及前國腳Daniel Cousin為雙國家隊教練,但當事人個仔竟然公開批評加蓬足協做法業餘?


53歲嘅「老奧巴美揚」Pierre Francois Aubameyang,又稱為Yaya Aubameyang,球員時代曾經效力勒哈弗爾、圖盧茲、尼斯等法國球會,於法國各級聯賽上陣超過200次,又曾以隊長身分帶領加蓬國家隊出戰非洲國家盃,為國上陣80場。

loading


根據《BBC》報導,現役國腳「小奧巴美揚」最近喺instagram上發表文章,怒斥加蓬足協:

「你哋向全世界宣佈我爸爸將會做國家隊主帥,但根本冇得到佢同意。

足協主席打電話俾我爸爸,問都冇問過佢嘅身體狀況,但其實佢而家身體唔舒服。

足協於是就咁開咗記者會同埋宣佈咗,明明我爸爸講咗第二日先答覆,而個答案將會係『不了』。

又例如,佢根本冇權去選擇教練團。總之,只有足協停止咁業餘嘅表現,國家隊先會進步同拎到好成績。你哋想問,點解我唔妥你哋、點解我唔想返嚟幫你哋踢波?你哋自己咪再一次解釋咗囉!」


其實,「小奧巴美揚」於法國出生,更代表過法國U21,最終選擇跟隨父親腳步效力祖國加蓬,2015年憑住帶領國家隊征戰非洲國家盃嘅表現,成為加蓬歷史上首位非洲足球先生,都唔可以話冇為國盡力,可能係恨鐵不成鋼。

對於呢場「羅生門」,今早加蓬足協發表聲明 (原文為法語,經facebook自動翻譯為英語,如有理解錯誤煩請見諒及指正) ,承認「老奧巴美揚」於電話對話中表示因為健康問題希望押後至周四答覆,而足協因應體育部門緊急指示,提前於周三晚上召開記者會,但已經知會相關人士,而且得到兩位當事人願意執教嘅意願,又稱有不少有能之士願意為國效力,足協不能接受現時出現嘅情況。


睇到一頭霧水,誰是誰非真係言之尚早。


Source: BBCGoal

留言


請按此登錄後留言。未成為會員? 立即註冊
    快捷鍵:←
    快捷鍵:→