罕見!隊長韋連拿重傷仍後備上陣 PAOK「不敗」奪34年首個聯賽冠軍

睇足365 於 23/04/2019 發表 收藏文章
足球場上向球員致敬嘅方式有好多種,不過最常見都係將嗰位球員換走,等佢接受現場觀眾嘅掌聲。好似當年車路士隊長泰利告別咁,球隊就將佢換走,隊友喺場邊列隊歡送。將一個球員換入,都係一個合理做法嚟嘅,但如果呢位球員有重傷在身,咁就特別喇。


日前,希臘超級聯賽球隊PAOK喺比賽尾段,換入佢哋早前重傷收咧嘅球隊隊長,而呢位隊長不是誰人,正是前禾夫斯堡葡萄牙右閘韋連拿 (Vieirinha) ,當年有睇德甲嘅球迷一定識佢。33歲嘅韋連拿其實並非首次效力PAOK,佢喺2006-09年效力波圖期間,以先借後買嘅方式加盟PAOK,由2008-09球季至2011-12球季季中都係著住PAOK波衫,直至2012年1月轉投禾夫斯堡。



韋連拿喺2017年8月重投PAOK,今季被委任為球隊隊長,而PAOK今季嘅戰績十分驕人,喺希臘超級聯賽保持不敗,但佢哋雖然喺今仗賽前28戰取得24勝4和0負,屬於國內班霸之一嘅奧林比亞高斯仍緊追不捨,加上PAOK今季被罰扣2分,令PAOK踢到最近一場比賽,即聯賽尾二嘅一輪要贏波,先肯定取得聯賽冠軍。可惜,一直喺場上帶領球隊嘅韋連拿不幸於上周比賽中,遭遇十字韌帶撕裂,需要休養最少半年。



不過,PAOK為咗向呢位隊長表達敬意,喺今場決定性嘅比賽中 (PAOK今仗只對已降班嘅利華迪亞高斯 Levadiakos ,但如果不能取勝,仍有機會被奧林比亞高斯後上奪冠) ,仍然將重傷嘅隊長放喺後備席上。PAOK去到法定時間90分鐘前,已經領先5-0,勝券在握,於是喺89分鐘,換入隊長韋連拿,好彩佢雖然十字韌帶重傷但仲可以行路,相信佢只要企到完場,就可以享受帶領球隊奪冠嘅榮譽,隊友亦幫佢戴上隊長臂章,受到在場球迷嘅起立致敬。




當然,希臘超仲有最後一輪比賽未踢,PAOK雖然已經提早一輪,34年嚟首次奪得聯賽冠軍,但如要真正拎到「不敗奪冠」嘅銜頭,仲要喺下一場對基亞尼拿 PAS Giannina 保持不敗。基亞尼拿戰績甚差現時只排聯賽尾三,但下仗佢哋要贏波先可以有護級一線生機,所以估計亦係一場硬仗。






Source: Sportbible

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→