【絕非首次】塞爾維亞前鋒施展收山腳被逐,鐵人辛尼腳踝硬食險斷腳幸無礙

睇足365 於 21/03/2019 發表 收藏文章
德國國家隊今個國際賽期出征應付歐洲國家盃外圍賽,由於小組隊伍數目為五隊,德國隊喺首輪賽事輪空,先安排與塞爾維亞進行一場國際友誼賽熱身。球壇有個現象叫做「FIFA病毒」,指好多球員因為出戰國際賽,帶傷返回球會,令好多教練感到「頭痕」,球員受傷本身已經冇人想見到,而如果喺友誼賽中受傷就更加無謂……


曼城翼鋒利萊辛尼上季喺英超表現十分出色,但去到2018世界盃決賽周,就被德國國家隊主帥路維喺出發前棄用落選。世界盃過後,利萊辛尼再次得到為國效力嘅機會,自然加倍努力表現自己,不過佢亦需要慎防受傷。

今場國際賽,德國喺主場同塞爾維亞友賽,雙方踢成1-1平手。戰至補時階段,利萊辛尼仍然憑出色嘅腳下功夫多番挑戰體力下滑嘅塞爾維亞球員,點知對手喺臨完場前都要「狠下殺手」。當時已過90分鐘,利萊辛尼盤球推過一人,旁邊殺出包抄嘅塞軍前鋒柏夫高夫 (Milan Pavkov) 唔知係有心定防守動作笨拙,用全身重量一腳踩落辛尼重心腳腳踝位置,更失去平衡倒向辛尼身上。


由重播畫面可見,辛尼踩中腳踝,受力極大,瞬間扭曲,如果係正常人可能已經斷腳。幸好辛尼痛苦倒地後,睇落仲有氣力同對手爭執,而球證即時出示紅牌將柏夫高夫趕出場。路維亦將辛尼換出,接受檢查。


賽後,路維透露辛尼並無大礙,下場對荷蘭嘅歐國外亦可上陣,又譴責柏夫高夫嘅犯規惡毒,有可能令辛尼斷腳,所幸辛尼完全冇受傷。


值得一提,柏夫高夫正係早前喺歐聯分組賽為貝爾格萊德紅星喺主場梅開二度,爆冷2-0擊敗利物浦嘅功臣,據聞身高1.93米嘅佢平時仲要兼職做電工。

事實上,辛尼已經唔係第一次喺同一位置硬食收山腳,佢喺上季2018年2月對卡迪夫城時,同樣被兇狠攔截踢中左腳腳踝,同樣係有機會導致重傷,結果佢雖然傷出並預計要休息6-7周,但2周後就極速復出,堪稱鐵人。 (《【成隊鐵人】辛尼曾中收山腳料休兩月 兩周即火速復出戰歐聯》) 辛尼今次預上嘅攔截睇落有可能造成比上次更嚴重嘅受傷,但佢完全無事,真係執返身彩。



Source: Daily Mail

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→