簡拿華路兼任中國隊主帥選召8名恆大國腳,納比仍以顧問身分助愛徒

睇足365 於 16/03/2019 發表 收藏文章
中國國家隊經過2019亞洲盃失利之後,主帥納比主動離任,更有報導指佢喺比賽中大發雷霆,賽後記者會上亦表示唔會感謝球員。帥位懸空嘅中國隊,今個國際賽期將會喺主場舉辦2019中國盃,與烏拉圭、烏茲別克及泰國三支國家隊進行比賽。


中國足協於星期五宣布委任中超球會廣州恆大主教練簡拿華路(Fabio Cannavaro)出任中國集訓隊主教練,帶領中國集訓隊出戰中國盃,簡拿華路隨後公布23人名單,選入8名廣州恆大球員,除曾誠、馮瀟霆、張琳芃三名常客外,高準翼、張修維、何超、韋世豪四位23歲球員國家隊經歷同樣不足10場。「大簡」同時選入三位國家隊新丁,分別係北京國安後衛李磊、江蘇蘇寧中場謝鵬飛,以及現年30歲仍未為國家隊上陣嘅上海上港前鋒呂文君。


上海上港:顏駿凌、傅歡、呂文君
廣州恆大淘寶:曾誠、馮瀟霆、高準翼、劉奕鳴、張琳芃、張修維、何超、韋世豪
山東魯能泰山:王大雷、蒿俊閔
北京中赫國安:李磊、張稀哲
江蘇蘇寧:李昂、吳曦、謝鵬飛
河北華夏幸福:姜至鵬、董學升
天津天海:王永珀
重慶斯威:彭欣力
長春亞泰:譚龍


另外,上任主帥納比仍會以顧問身分留隊,協助簡拿華路工作,呢兩位曾經聯手帶領意大利國家隊捧起2006世界盃冠軍嘅師徒將會再度合作。不過,中國傳媒指出,簡拿華路現時以中國集訓隊主教練身分帶領中國隊,雖然地位上已接近正式出任中國代表隊主教練,但「大簡」最終會唔會「坐正」長期執教中國隊,暫時仍屬未知之數;廣州恆大會方就表示,若「大簡」最終被正式委任為中國隊主帥,球會將物色繼任人選,言下之意係唔願意俾佢兼職執教。

3月21日,中國隊將於廣西南寧迎戰泰國,除卡雲尼外精銳盡出嘅烏拉圭,就會對烏茲別克,勝方將會喺3月25日會師決賽,同日設季軍戰。


Source: 中國盃國際足球錦標賽官網Wikipedia: 2019 China Cup

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→