【答案係】「狼隊對曼聯」名宿39歲照做隊內神射手,自由身離開登地

睇足365 於 25/06/2019 發表 收藏文章
因為「足金金猴」事件而成為香港球迷多年來茶餘飯後話題嘅前狼隊前鋒堅尼米拿 (Kenny Miller),雖然已年屆39歲,仍然擁有不俗入球能力,佢最近因為所效球隊降班而以自由身離隊。


「問題就係問呀,狼隊對曼聯嘅賽事入面,邊位狼隊球員為球隊射入奠定勝利嘅一球而全取3分呢?

答案係堅尼米拿。」

39歲嘅前蘇格蘭國腳堅尼米拿,生涯曾經效力喜伯年、格拉斯哥流浪、狼隊、些路迪、卡迪夫城、溫哥華白帽等多間球會,其中最為香港球迷熟悉嘅係效力狼隊時期,佢喺167場比賽內為狼隊射入52球,亦係佢個人生涯入球最多嘅球會,但效率最高嘅時期就係2008-11年第二度效力格拉斯哥流浪,81場內攻入49球。

關於近年嘅經歷,堅尼米拿喺2014-18年間第三度效力格拉斯哥流浪,2018夏天佢一度成為蘇超球隊利雲斯頓嘅球員兼領隊,但只執教七個星期就同球會解約,據稱原因係球會希望堅尼米拿轉任全職領隊,但堅尼米拿仍希望繼續職業球員生涯,因此決定和平分手。

2018-19球季,堅尼米拿加盟另一隊蘇超球隊登地 (Dundee) ,雖然年紀「老邁」,仍然喺35場比賽中射入8球,成為球隊呢季嘅神射手。可惜,登地呢季戰績十分差,最終排包尾降班,來季要同同市球隊登地聯喺蘇冠重聚。

大概係因為堅尼米拿仍有喺蘇超立足嘅能力,雙方最終達成協議解約,令堅尼米拿以自由身離隊,唔需要隨隊降班。



堅尼米拿2018-19球季曾大演帽子戲法

「足金金猴」事件 + 雪恥版

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→