碩士博士生組大學球隊,歷史性殺入歐霸!

睇足365 於 21/05/2019 發表 收藏文章
小弟記得曾經有一日睇波經,見到墨西哥超級聯賽有場波,戲碼係瓜達拉哈拉對瓜達拉哈拉大學,覺得十分有趣,一直記到今日。 瓜達拉哈拉大學呢隊波個名就有大學兩隻字,咁到底係唔係真係一支大學校隊呢?請恕小弟完全唔認識墨超環境,但相信呢支墨超球隊 (現時只於次級墨甲征戰),應該都係由職業球員組成,而唔係大學校隊。不過以下要講呢隊波,不但真係由學生組成,真係踢緊威爾斯超級聯賽,仲啱啱成功殺入歐霸賽事,認真唔容易。


卡迪夫都會大學 (Cardiff Metropolitan University) 係一間位於英國威爾斯首府卡迪夫嘅公立大學,佢哋喺2000年創立卡迪夫都會大學足球會 (Cardiff Metropolitan University Football Club),由最低級別聯賽打起,直至2016年升上威爾斯超級聯賽。綽號 "the students" 嘅佢哋,係貨真價實嘅學生,主要由喺卡迪夫都會大學修讀運動心理學、運動教學、績效分析等運動相關嘅碩士及博士生組成 (雖然估計佢哋呢個背景,應該都係一啲唔錯嘅業餘球員,並得到前史雲斯球員Christian Edwards執教) ,佢哋已經連續第三年晉身威爾斯超級聯賽嘅歐霸資格附加賽決賽,可惜前兩次飲恨而回。

由於威爾斯聯賽於歐戰系數排名唔高,根據威爾斯超級聯賽賽制,12支球隊中,聯賽冠軍可以出戰歐聯外圍賽首圈,亞軍及季軍就得到歐霸外圍賽首圈及初賽席位,餘下一個歐霸初賽席位,由聯賽4-7位進行淘汰賽決出一個名額。


今季於威超排第7位嘅卡迪夫都會大學隊,喺決賽以互射12碼階段,因為門將Will Fuller神勇演出救出3個12碼,擊敗 Bala Town ,取得威超最後一個歐霸席位,並且得到 220,000 歐元獎金。





正如前面所講,由於威爾斯聯賽於歐戰系數排名唔高,所以卡迪夫都會大學隊只能進入歐霸初賽 (Preliminary round) ,需要喺初賽贏波,先可以進入外圍賽首圈,然後仲要沿路經過第二圈、第三圈以至附加賽,先可以入到歐霸分組賽,困難重重。


不過,呢次對卡迪夫都會大學隊嚟講已經係了不起嘅成就,因為今次係歐霸史上首次有大學球隊出現,即使只係初賽。卡迪夫都會大學隊將會面對嘅初賽對手有可能來自法羅群島、直布羅陀、盧森保、科索沃等。更厲害嘅係,卡迪夫都會大學女子隊已經直接晉身來季歐霸外圍賽,成功晉級就可以進入32強。


Source: Sportbiblewalesonlinewales247

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→