痴心球迷英超Fantasy揀水晶宮邊緣人做隊長,球員感人回信:「如果你嚟睇波我會不斷熱身希望俾你見到」

睇足365 於 19/12/2018 發表 收藏文章
球迷嘅支持,永遠係球員嘅一大動力。球員生涯有狀態起伏、制遇衰旺,甚至傷病困擾,對於唔係一線球星嘅球員嚟講,機會唔多,一兩次失誤隨時導致一兩季坐冷板凳,或者要去更低級數球會重新起步,球迷呢份不離不棄嘅支持就更加難得。一位英超球會水晶宮嘅邊緣人,雖然發展唔順利,但得到一位球迷嘅衷心支持,唔知佢可唔可以喺呢份鼓舞之下走過高山低谷呢?


如果有玩「英超Fantasy」 (Fantasy Premier League) ,一定好清楚點樣拎高分,球員會因為喺本周賽事入球、助攻、上陣時間等數據而得到分數,玩家需要事先以有限預算選入出戰11人及後備席,一周比賽過後計算總分數,所以玩家一定會盡可能選擇有恆常上陣機會及貢獻嘅球員。另外,玩家每周可以喺陣容中選出隊長,佢得到嘅分數會得到加倍獎勵,所以隨時成為勝負關鍵。


一位相信嚟自挪威嘅球迷 Jonas Øren Antonsen 竟然喺「英超Fantasy」遊戲中,買入水晶宮邊緣人阿歷山大索洛夫 (Alexander Sørloth) ,而且仲將佢選為隊長。究竟係唔係亂咁玩先至咁做?相信唔係,因為阿歷山大索洛夫係挪威國腳,所以呢位挪威球迷應該係有意揀佢,但同時英超仲有另外兩位挪威國腳,分別係效力富咸嘅國家隊隊長史提芬祖漢臣 (Stefan Johansen) 及修咸頓嘅穆罕默艾爾尤諾斯 (Mohamed Elyounoussi) ,特別係後者,喺「英超Fantasy」中取得分數嘅機會比起阿歷山大索洛夫更高,但呢位球迷仍然對阿歷山大索洛夫情有獨鍾。

事實上,索洛夫2018年1月由挪超勁旅米迪蘭特加盟水晶宮,轉會費據報為900萬英鎊,但至今只於所有賽事上陣過19場。不過呢位23歲前鋒仍然勉強稱得上國家隊常客,由2016年中上演大國腳首戰至今,已累積17次上陣紀錄,近期亦有於歐洲國家聯賽中後備上陣。球會近況方面,索洛夫今季17輪英超中得到12次後備上陣機會,但場均只得約14分鐘時間,聯賽盃就打足,三場全數正選上陣踢足90分鐘,貢獻1入球1助攻。


知道自己得到球迷支持,索洛夫十分感動,佢透過球會回信俾球迷,內容亦賺人熱淚:

「親愛的Jonas,

我以自豪及興奮心情寫呢封信俾你,我從可靠消息得知自己係你fantasy隊伍中嘅隊長及首選前鋒。

我知道自己好少有入球、助攻,或者都好少上場比賽。所以我知道仍然有人相信我喺呢僅有嘅15次上陣機會嘅表現時,覺得非常高興。

你同我其他最重要嘅球迷、爸媽,都係我繼續為水晶宮同挪威國家隊努力嘅動力。你係當我每場只係上陣5分鐘時腦裡諗住嘅人。

關於我嘅上陣時間,我唔會諗太多,而且因為我冇太多機會掂波,我都唔應該諗太多。所以我只能夠喺球場入面到處張望,睇下有冇你為我打氣嘅身影。Jonas,希望你有一日會嚟現場睇我熱身。我會同鶴臣 (領隊) 傾下,等我有更多時間熱身,喺場邊跑嚟跑去,咁樣如果你嚟倫敦睇波,就可以見到我。

我冇辦法幫你拎到免費波飛,呢個係最勁嘅球員先做到嘅事,不過已經同球場入面賣爆谷嘅阿姐 Edna 講好,佢會俾個85折你。

如果你嚟英格蘭,喺Facebook聯絡我啦!

你的朋友、隊長、前鋒,
阿歷山大索洛夫」



真係睇到人眼濕濕,希望索洛夫快啲打起信心啦!水晶宮喺鶴臣帶領下暫時排聯賽第15位,但17輪聯賽入球只得14球,近仗都寧願採用四中場陣式,將靈巧嘅唐辛或阿休流喺鋒線輪流夥拍沙夏攻堅,身才高大嘅阿歷山大索洛夫及域咸同樣機會有限。

Source: SportbibleTransfermarkt

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→