甸恩再執法熱刺比賽成功「洗底」(誤) 普捷天奴賽後鬧甸恩被英足協指控

睇足365 於 26/02/2019 發表 收藏文章
英超球證甸恩 (Mike Dean) 一向同爭議多多,更曾經被指為熱刺球迷,認為佢多次喺執法嘅賽事中令熱刺受益。奇怪嘅係,雖然甸恩曾經因為被調查後發現有執法失誤而被罰,但相關部門並冇因此而避嫌,喺爭議聲中仍然繼續多次俾佢執法熱刺嘅比賽。難怪有陰謀論指,當局故意俾機會甸恩執法熱刺比賽,從而「洗底」。舉個例子,甸恩今季各項賽事執法27場,當中有5場係熱刺,全部屬於聯賽嘅比賽;球證奧利華 (Michael Oliver) ,今季各項賽事執法34場,當中只有2場熱刺嘅聯賽同1場盃賽;馬連拿 (Andre Marriner) 24場比賽中亦只有2場聯賽及1場盃賽執法熱刺嘅比賽。

https://i.imgur.com/m3QTM6o.gif


如果甸恩真係想「洗底」,擺脫偏幫熱刺嘅既有印象,佢可能已經接近成功。啱啱周末嘅英超比賽中,甸恩再次執法熱刺作客般尼嘅賽事,因為一次爭議判決,賽後受到熱刺主帥普捷天奴責難。《BBC》及《Sky Sports》報導,普捷天奴因為賽後衝入球場質問球證,被英格蘭足協控以行為不當,有可能被罰停賽一場,周末對阿仙奴時要喺看台上做觀眾,普帥須於英國時間周四下午6時前回應指控。


事件緣於比賽55分鐘,甸恩判般尼獲得角球,最終般尼憑呢個角球攻勢,由基斯活特頭槌破網,先開紀錄,熱刺最終以1-2不敵般尼。普捷天奴認為呢一球唔應該係般尼球員觸球出界,所以唔係角球而係龍門球,於是喺賽後聯同副手激動衝入草地範圍質問甸恩,其間大聲講出「你有咩講呀?」之類字句,氣氛緊張。

Sky Sports相關片段:
https://youtu.be/m7x3A2Owc8M
普捷天奴其後回應,承認自己行為過火,又願意接受足協處理,不過認為比賽場上發生嘅事 (誤判) 唔應該再發生。

另外,甸恩本來會喺周四車路士對熱刺嘅比賽中擔任第四球證,由於第四球證會喺場邊同雙方主帥溝通,為避免再次發生衝突,甸恩嘅位置會由馬連拿取代。

其實,甸恩今季已經被球迷發現「轉投」死敵阿仙奴懷抱 (誤):

Source: Sky SportsBBC

留言


請按此登錄後留言。未成為會員? 立即註冊
    快捷鍵:←
    快捷鍵:→