狂人比爾沙領列斯聯示範十上十落 對手「1 vs 1」快攻秒變「1 vs 7」被圍

睇足365 於 05/11/2018 發表 收藏文章
一代戰術大師、阿根廷籍教頭比爾沙 (Marcelo Bielsa) ,今季受英冠球隊列斯聯邀請執教,旨在為呢支昔日勁旅重拾光彩,第一步當然係爭取升上英超,比爾沙暫時為球隊帶嚟嘅新元素,列斯聯擁躉一定收貨。


列斯聯上季「衝超」虎頭蛇尾,球季26之前大部分時間佔據前6位,但最終只能以第13名完成,今季請嚟名帥比爾沙,展現出雄心壯志。63歲嘅比爾沙,近年執教經歷大多不太愉快,2014-15執教馬賽開始,到2016拉素、2017里爾,都係同球會不和收場,更只上任拉素2日就離任兼惹上官非。


令佢被稱作「狂人」嘅無疑正係佢為人不顧旁人目光嘅作風,當然仲有佢執教風格,比爾沙嘅高強度訓練及對球員跑動嘅要求,簡直係「魔鬼教練」,以下呢一個片段可能解釋晒一切:

喺周日英冠比賽,韋根主場對列斯聯,近日即將落實賣盤嘅韋根,上半場先由列斯占士 (Reece James) 於開賽6分鐘先開紀錄,但3分鐘後,列斯聯就由柏保路靴南迪斯 (Pablo Hernández) 扳平。下半場一開波,基馬胡菲 (Kemar Roofe) 為列斯聯射入反超前一球。

loading

比賽50分鐘,列斯聯角球攻勢空群出擊,韋根嘅祖舒韋達斯 (Josh Windass) 得到快速反擊機會,同列斯聯守將邦圖斯贊臣 (Pontus Jansson) 形成一對一,只要過埋就可以單刀,但呢個時候六名列斯聯球員起勢回追,祖舒韋達斯扣過邦圖斯贊臣時,已經被包圍,快攻亦被瓦解。列斯聯最終成功以2-1作客反勝韋根,暫時重返榜首。

loading
loading


英冠暫時踢咗16輪,列斯聯以8勝6和2負得30分,得失球差+15,稍壓同分嘅諾域治排榜首。列斯聯喺比爾沙麾下的確展現出熱血一面,不過現時列斯聯其實同第8位布力般流浪都只係相差5分,而第16位嘅韋根亦有20分,英冠共踢46輪,列斯聯爭升班仍要經過漫漫長路,唔知一班球員喺比爾沙鞭策之下,可唔可以喺餘下30場聯賽中保持水準?


全場精華

https://www.youtube.com/watch?v=hH20RttIKLI

留言


請按此登錄後留言。未成為會員? 立即註冊
    快捷鍵:←
    快捷鍵:→