熱刺借用失敗,巴舒亞伊加盟水晶宮變及時雨

睇足365 於 01/02/2019 發表 收藏文章
車路士前鋒巴舒亞伊 (Michy Batshuayi) 一直唔喺球隊短期計劃之中,佢上半季外借到西甲華倫西亞,但於各項賽事上陣23場只射入3球,結果佢喺一月轉會窗開啟後被終止借用,返回車路士再次尋求外借機會。根據此前嘅傳會消息,有興趣借用巴舒亞伊嘅球隊包括摩納哥及愛華頓,但事情喺交易截止日出現令人意外嘅發展。


25歲嘅比利時前鋒巴舒亞伊表現飄忽,雖然加盟車路士以嚟機會唔多,表現亦唔算出色,但佢喺2017-18球季上半段外借到德甲多蒙特期間如魚得水,10場聯賽貢獻7個入球及1個助攻,效率極高;今季上半段去到西甲華倫西亞情況又截然不同,各項賽事23場只射入3球。不過,總有人有信心令佢發揮出水準。根據《Sky Sports》早前報導,摩納哥及愛華頓有意租用巴舒亞伊半年,其中摩納哥已經極度接近完成交易,原因當然係摩納哥當時仍由前比利時國家隊助教亨利執教。不出兩個星期,亨利被摩納哥解僱,交易取消亦係情理之中。

與此同時,英超熱刺遇上主力射手哈利簡尼受傷,有意借用巴舒亞伊半季「救火」。《Sky Sports》報導指,巴舒亞伊嘅代表曾經主動聯絡熱刺,球員本人及熱刺都對借用有興趣,但車路士唔願意俾巴舒亞伊加盟呢支英超前四競爭對手,因此作罷。

最後關頭,水晶宮成為「程咬金」,得到巴舒亞伊效力半季。水晶宮主席 Steve Parish 表示,呢個係好好嘅交易,水晶宮已經仰慕巴舒亞伊甚久,相信佢可以為球隊帶嚟巨大貢獻。


事實上,巴舒亞伊加盟正係水晶宮嘅及時雨。水晶宮前鋒韋費特沙夏 (Wilfried Zaha) ,喺上一輪聯賽對修咸頓一仗中,因為向球證投訴而連領兩面黃牌被逐,佢喺兩黃一紅後繼續拍手掌諷刺球證,《BBC》報導指佢將會面臨英格蘭足協「行為不檢」嘅指控,本身兩黃一紅停賽嘅勢必被加罰一至兩場。韋費特沙夏雖然今季只喺聯賽攻入4球,但仍然係球隊鋒線嘅領頭人物,佢嘅竄繞及突破能力仍然係球隊倚重嘅能力,佢嘅缺陣將會帶嚟嚴重後果。巴舒亞伊雖然突破力一般,但同樣屬於靈活型前鋒,相信可以暫時減少沙夏缺陣嘅影響,沙夏刑滿後更可與佢合作攻堅。


Source: Sky SportsBBC

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • dickens
    dickens 於 01/02/2019 評論 NO. 1

    車仔不要自以為大把鈔票就有用,絕對配不上做熱刺的對手。阿先奴及曼聯才是車仔爭第四的對手。

快捷鍵:←
快捷鍵:→