比利連前十字韌帶斷裂休六至九個月,阿仙奴無意簽新右閘

睇足365 於 22/01/2019 發表 收藏文章
阿仙奴於最近一輪聯賽以2-0擊敗車路士,但付出極為沉重嘅代價,右閘比利連 (Hector Bellerin) 喺比賽中重傷,需要以擔架抬出場,途中比利連全程掩面,狀甚失望。主帥艾馬利進攻體系極大程度上依賴於兩翼壓上助攻,今次比利連再次受傷勢必大大影響阿仙奴餘下賽事嘅部署及表現。


根據《BBC》報導,阿仙奴右閘比利連已經完成掃瞄檢查,證實右膝前十字韌帶斷裂 (ruptured ACL) ,今季餘下賽事都不能上陣,需要休戰6至9個月。


得到完整檢查結果前,阿仙奴主帥艾馬利接受訪問時,承認比利連傷勢恐怖不妙,但佢表示陣中有足夠替代人選,包括瑞士老將列治史甸拿 (Stephen Lichsteiner) 同小將美蘭尼爾斯 (Ainsley Maitland-Niles) ,而且仲有贊堅遜 (Carl Jenkinson) 。


《Sky Sports》報導指,阿仙奴無意喺今個轉會窗內收購右閘替代人選。不過,可以觀察到,阿仙奴喺比利連缺陣嘅比賽中,往往無法踢出一貫流暢進攻套路,老將列治史甸拿完全冇辦法提供接近嘅右路進攻速率,令對手少一個防守目標,中路及左路進攻壓力增大,更無法用進攻掩蓋一直存在嘅防守漏洞,加上贊堅遜暫時仍未可以予人信心,似乎阿仙奴只能依賴年輕力壯嘅美蘭尼爾斯。


Source: BBCSky Sports

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→