【武肺下的足球】錫永撐唔住炒九名球員,兩前阿仙奴兵當災

睇足365 於 20/03/2020 發表 收藏文章
「武漢肺炎」持續於歐洲肆虐,部分歐洲國家已採取封城措施應對,大部分體育賽事都被勒令暫停,以減少人群聚集。疫情不僅對人嘅健康構成威脅,同時影響到經濟層面,各地因避疫封城而市面經濟蕭條,服務業零售業隨時出現倒閉潮。球壇方面,各地聯賽暫停亦令球會收入大減,部分中小型球會更陷入財困,需要想辦法支付職球員薪金,其中一例就係為人熟悉嘅瑞士球會錫永。

loading

先講英國,英格蘭各級職業聯賽宣布暫停至4月30日,首當其衝嘅係恆常於比賽日工作嘅臨時工,包括保安、場地管理、接待及餐飲等工種,可謂手停口停。《BBC》報導,英超球隊曼聯就宣布無論如何都會向臨時工繼續發薪,希望為員工提供保障。不過就唔係間間球會都有咁嘅底蘊可以喺收入大減之下,向無法工作嘅員工出糧,可以想像情況喺小球會身上會係幾咁嚴峻,有幾多職員生計受影響。


想唔到,著名瑞士球會錫永 (FC Sion) 呢間百年老店,同樣陷入危機,更需要解僱球員。路透社瑞士足球記者 Brian Homewood 於《Daily Mail》撰文,報導指錫永日前將9名一隊球員解僱,呢啲球員並非無名之輩或邊緣人,而係包括隊長哥亞斯 (Xavier Kouassi)、前阿仙奴中堅兼瑞士國腳迪佐奴、前阿仙奴中場桑治、瑞士國腳卡沙米、科特迪瓦國腳杜姆比亞等。


報導指出,瑞士近日因疫情而無限期停戰,令球會收入大減,錫永會方於今個星期二通知全體球員,提出要求佢哋「技術性失業」 ('technical unemployment') ,即取消平常球員薪金,改為於停戰期間向球員支付12,000瑞士法郎月薪 (約11,337.97歐元),變相大幅減薪,並要佢哋喺星期三中午前回覆。

不過,有好多球員並冇回覆,最終就係9名球員被球會解僱,名單如下:

桑治 Alex Song
迪佐奴 Johan Djorou
哥亞斯 Xavier Kouassi
卡沙米 Pajtim Kasami
蘭真尼 Ermir Lenjani
杜姆比亞 Seydou Doumbia
法仙尼迪 Mickael Facchinetti
索克 Christian Zock
尼度耶 Birama Ndoye

loading

loading
loading


現年33歲嘅迪佐奴,2018-19球季效力意甲史帕爾僅半季就被解約,失業一年後終於喺今年1月底回國加盟錫永,但加盟直至聯賽暫停前只有5場聯賽,佢更因傷患只曾上陣其中2次。32歲嘅桑治留隊時間就長得多,佢2018年1月離開魯賓卡山後失業半年,2018年8月加盟錫永,效力至今,今季各項賽事上陣12次。
雖然消息已獲廣泛報導,但錫永官方並未發聲明宣布有關消息,亦未有回應。

Source:
Daily MailGoal

留言


請按此登錄後留言。未成為會員? 立即註冊
    快捷鍵:←
    快捷鍵:→