朗尼承認醉酒駕駛向球迷道歉,被判停牌兩年及100小時服務令

睇足365 於 19/09/2017 發表 收藏文章
早前,愛華頓球星朗尼因為喺英國時間9月1日凌晨時份揸車時被警察截停,揭發佢醉酒駕駛而被檢控。噚日,佢出庭應訊時,承認控罪,法庭就判佢停牌兩年,同埋要做100小時社會服務令。


喺英國時間9月1日凌晨,朗尼揸住一架唔屬於佢嘅Volkswagen Beetle甲蟲車,喺公路上行駛,駛經曼徹斯特南部嘅Wilmslow,被警察截停,經過酒精呼氣測試,相信佢當時血液酒精含量超標三倍。

呢樣都未係最大鑊,最慘係當時有一位女士喺架車入面,佢就係架車嘅車主、29歲嘅Laura Simpson,據報朗尼係去酒吧夜浦時認識嘅,半夜三更揸住人哋架車走,唔通淨係送人返屋企咁簡單?另一方面,原來朗尼太太Coleen依家有咗BB,出咗國度假,「月巴「喺呢個時候被揭發出去夜浦,搞到老婆好鬼嬲,隨時鬧婚變。


醉酒駕駛真係害己害人,好彩今次冇撞到任何人,加上「月巴」上庭時直接承認控罪,獲得法庭輕判停牌兩年同埋須要喺一年內完成100小時社會服務令,不過老婆就冇現身法庭。「月巴」被控告之後,已經被愛華頓罰咗兩星期人工,大約32萬鎊。另外,佢都發聲明向球迷道歉:「在今日的受審之後,我希望為我醉酒駕駛的行為公開道歉,這是完全錯誤的。」

「我已經向我的家人、領隊、球會主席及所有愛華頓的人道歉。現在,我想向所有球迷,和在我生涯以來一直支持我的人道歉。」

「當然,我接受法庭的裁決,亦希望能透過社會服務令彌補我的過錯。」

Source: SkySports

留言


請按此登錄後留言。未成為會員? 立即註冊
    快捷鍵:←
    快捷鍵:→