【「朕」來了】簽「武球王」失敗，狼隊簽下英乙17歲中國小將 精選

今季升上英超作賽嘅狼隊，因為有中國財團背景，早前曾經傳出要引入中國國腳武磊，但事情最終不了了之。狼隊最近就宣布，已經簽下17歲中國籍小將何朕宇，佢會加入狼隊青年軍。


有關武磊轉會傳聞，事實上即使球會同球員達成共識，武磊仍然雖要通過工作證一關，但由於中國國家隊並非屬於世界排名前50位球隊，令武磊難以取得工作證。有見及此，已經26歲嘅「武球王」都稱要先幫助上海上港奪冠，然後先考慮出國。

中資嘅狼隊並未放棄簽入中國球員，據聞佢哋被中國財團復星國際收購時，有條款規定球隊需要引入中國球員。佢哋最終選擇咗17歲中國小將何朕宇。個人認為呢個選擇合理過武磊太多，點解？


原來呢位何朕宇雖然出身於中國大連，但已經喺英國浸淫多年，並冇工作證問題。另外，何朕宇本來效力英乙球隊諾士郡 (Notts County) ，雖然年僅17歲，但最近成功擠身一隊陣容，於季前賽獲前韋斯咸老臣、諾士郡球員兼教練奇雲路蘭 (Kevin Nolan) 派上陣並射入一球，更進入首輪英乙比賽嘅後備名單。雖然唔係咩突出嘅球員，但起碼係一個腳踏實地喺低組別磨練過嘅年輕球員，適應當地環境唔成問題，加上年輕有上升空間，而且佢身高已經達到1.87米，喺英格蘭足球環境中都係一個優勢。

奇怪嘅係，中文媒體形容佢係前鋒，但英文媒體及狼隊官網都稱佢為中場，而佢嘅中英文名亦係完全唔夾，中文名係何朕宇，但英文名係 Dongda He ，實在耐人尋味。無論如何，狼隊最近簽下嘅17歲中國小將就只有一個。

當然，何朕宇將會繼續腳踏實地，喺狼隊青年軍學習。即使係英格蘭本土天才球員，喺17歲得到英超上陣機會嘅都唔多。公道啲講，冇理由覺得何朕宇喺一兩年內得唔到一隊上陣機會就係失敗，但將來前路如何，都要睇佢際遇，更重要嘅係態度。


Source: wolves.co.uk、nottinghampost、Sina