【日本雙星之一】皇馬15歲日本神童射入世界波技驚四座

睇足365 於 13/04/2019 發表 收藏文章
日本年青球員人才輩出,早前已經有「日本美斯」久保建英 (Takefusa Kubo) 效力巴塞隆拿青年軍,久保建英表現雖然十分出色,但後來因為巴塞隆拿違反FIFA有關簽入18歲以下球員嘅規例,而唔可以再為巴塞上陣比賽,於是已經返回日本,今年17歲嘅佢由FC東京外借效力J League橫濱水手。


不過,日本球迷唔需要失望,日本仲有一位喺西甲豪門靜待上位嘅超級新星,佢係經常被拎嚟同久保建英相提並論嘅中井卓大 (Takuhiro Nakai) ,15歲嘅佢正效力皇家馬德里青年軍,絕對係同代日本年青球員中嘅代表人物。



中井卓大早於9歲已經加入皇馬青訓營,能夠留效至今,天分、努力同適應能力缺一不可,佢最近再一次提醒廣大球迷,自己喺未來將會挑戰皇馬一隊席位。早前喺一場U16比賽中,中井卓大代表皇馬青年軍A隊正上陣,喺下半場開賽冇耐,中井卓大中路盤球突破,突施冷箭,皮球直飛左上角入網,呢個世界波幫助皇馬最終以3-0擊敗拉斯羅薩斯 (Las Rozas) 。


司職中場嘅中井卓大喺皇馬青年軍陣中外號 "Pipi" ,以盤扭技術見稱,網上已經可以搵到唔少佢嘅精彩片段。


有別於一般日本球員,中井卓大因為自細喺西班牙長大,可能對佢發育有正面影響,佢今年15歲,但官方資料顯示身高已經有1.76米、重59.6公斤,明顯比效力艾拉維斯嘅大前輩乾貴士高半個頭,亦高過大兩歲嘅久保建英。


如果喜歡我們的文章,請即分享到︰

標籤: 久保建英  中井卓大  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→