撐愛徒屬世界級中場,雲加評阿仙奴放藍斯:「呢個係阿仙奴嘅損失!」

睇足365 於 18/02/2019 發表 收藏文章
眾所周知,前阿仙奴領隊雲加對舊東家感情深厚,畢竟已經喺呢間球會工作22年,離任後自然成為忠實球迷。意甲班霸祖雲達斯近日正式宣布簽下阿仙奴中場艾朗藍斯,於季後加盟,據報周薪達到40萬鎊。藍斯嘅能力喺球迷之間嘅一直得到兩極評價,但當年一手引入藍斯栽培嘅雲加就認為佢屬於不可多得嘅人才。


雲加喺2008年由卡迪夫城收購17歲嘅艾朗藍斯,藍斯11年嚟喺阿仙奴經歷過斷腳重傷及多次傷患,但雲加仍然對佢不離不棄,不斷給予機會,因此有人稱藍斯係雲加「契仔」,指佢無論表現好壞都會成為球隊必然正選。另一極端嘅意見就認為,藍斯嘅體能、跑動覆蓋範圍都十分出色,佢嘅無球跑動及入楔能力更係中場球員中罕見,令佢足以成為一位世界級中場。事實上,藍斯為阿仙奴各項賽事上陣361場,共錄得62個入球及64個助攻,表現不俗。


據《BBC》較早前報導,相信藍斯一度同阿仙奴達成續約協議,但阿仙奴高層臨時將新合約抽起,估計係認為佢唔值得大幅度加薪,結果導致藍斯喺季尾以自由身離隊。雲加近日被問題對於阿仙奴放走藍斯嘅睇法,坦言認為呢個係一個錯誤:

「呢個對阿仙奴嚟講係一個損失。不過我都必須要講,呢次轉會對藍斯嚟講係一個有趣嘅機會。

佢前插嘅能力好出色,佢嘅強項係可以保持控球,又可以從後入楔。今時今日喺球壇上好難搵到中場無球跑動能力咁出色嘅球員,對祖雲達斯嚟講係有趣嘅收購。」


Source: Sky Sports

留言


請按此登錄後留言。未成為會員? 立即註冊
    快捷鍵:←
    快捷鍵:→