摩連奴談曼聯出局:「好多錯漏,美斯並唔係咁mark嘅」

睇足365 於 20/04/2019 發表 收藏文章
前曼聯主帥摩連奴自從2018年12月中被解約之後,至今仍然未有新教職,佢繼續喺RT電視台 (Russia Today) 上擔任客席評述分析賽事。佢最近就指出曼聯喺歐聯次回合被巴塞隆拿輕鬆以3-0取勝,所犯下嘅錯誤,更提出自己對防守美斯嘅睇法,正所謂敵人嘅敵人就係朋友,唔知即將喺四強面對巴塞嘅利物浦會唔會考慮摩佬嘅意見呢?


曼聯喺歐聯次回合作客巴塞隆拿,美斯喺16及20分鐘已經梅開二度,加上古天奴下半場使出「古一招」推大位熨射彎入,令巴塞以總比數4-0輕鬆晉級。坦白講,曼聯喺首回合主場輸一球之後,好多球迷都認為曼聯出局係意料中事,但出局結果可接受還可接受,曼聯喺次回合嘅表現仍然係令好多球迷失望,進攻方面兩回合一球未進,防守方面次回合亦特別差勁。

loading

前領隊摩連奴就喺節目上批評紅魔鬼:「好多錯漏,太多球mark唔住對手切入內側起腳,你睇下古天奴嗰球就知,仲有美斯都係。」

「我覺得曼聯嘅部署唔同咗,首回合,佢哋嘗試填補中路區域。美斯嘅位置其實唔難理解,但就好難去阻止佢,因為佢會喺右路切入中間,然後拉傑迪會拉出右路,令美斯可以留喺中間中後場之間空位,咁就好難mark佢。首回合,曼聯『佔中』做得非常好,當美斯切入中路就會面對費特同麥湯文尼跟入嚟中間補位。」

「去到次回合,因為曼聯落後緊一球,佢哋嘗試用呢一個方法去開局。呢個時候普巴喺偏左,麥湯文尼就偏右,連加特踢前鋒身後嘅10號位,而防線前面就只有費特。呢個就正正係美斯切入中間拎波用波嘅位置。當你俾美斯拎到波,過一個、兩個、三個,你就死得。所以我對美斯嘅時候,永遠唔會用人盯人,你需要一個籠先可以困住佢。 (That’s why I never liked individual man-on-man against Messi. Messi's a cage. You have to create a cage.) 」

「巴塞始終係巴塞,佢哋勁過曼聯,佢哋有更好嘅球員,我認為佢哋贏波係好正常。」

Source: GoalManchesterEveningNews

留言


請按此登錄後留言。未成為會員? 立即註冊
    快捷鍵:←
    快捷鍵:→